Боралдайда 65 адам сушиден уланды: Санитарлық дәрігерлер асүйден не тапты?

Боралдайда 65 адам сушиден уланды, қазір суши-бардың жұмысы тоқтатылып, іс материалдары полицияға берілді, деп хабарлайды Orda.kz.

КТК мәліметінше, Алматы облысы Іле ауданындағы санитарлық дәрігерлер Боралдай кентіндегі Sushi Time суши-барындағы жаппай улануға қатысты сараптама қорытындысын жариялады. Кафе «Алатау» базары аумағында орналасқан.

Мұнда суши мен пицца жеген 65 адамның барлығының жағдайы нашарлаған. Жүрегі айнып, құсып, іші ауырған 36 адам үш ауруханаға жатқызылса, тағы 29 адам амбулаторлық ем алған.

Сараптама барысында дайын өнімнен ішек таяқшасы мен стафилококк анықталды. Асүйден жәндіктер табылған, ал ішек таяқшасы үстелдер мен асүй құралдарынан да шыққан. Балық, күріш және ірімшік дайын өніммен бірге еденде сақталған. Иесінің шикізатқа арналған сапа сертификаттары болмаған, ал қызметкерлер медициналық кітапшасыз жұмыс істеген.

«Суши-бардың қызметі толық тоқтатылды. Қауіпті өнім тәркіленіп, жойылды. Зардап шеккендердің барлығы ауруханадан шығарылды»,  деп хабарлады Іле аудандық санитарлық-эпидемиологиялық бақылау басқармасы.

Іс материалдары құқық қорғау органдарына жолданды.

Бұған дейін Orda.kz Боралдайдағы жаппай улану туралы алғашқы ақпараттың маусым айының ортасында тарағанын жазған еді. Сол кезде 19 адамның зардап шеккені белгілі болған. Санитарлық дәрігерлер бірден кафені жауып, өнімдерді сараптамаға жіберген.

Кейін зардап шеккендердің саны 65 адамға дейін жетті.

Оқи отырыңыз:

ШҚО-дағы арал 10 млн долларға сатылатыны рас па?

Алматыдағы «Гелик» қатысқан жол апатынан аман қалған әйелдің жағдайы белгілі болды