БҰҰ Қауіпсіздік Кеңесі: Вашингтон мен Париж арасындағы шиеленіс ушықты

Америкалық дипломаттар БҰҰ Қауіпсіздік Кеңесі отырысында Франция өкілдері сөз сөйлеген кезде залдан шығып кетті. Бұл қадам Вашингтонның адам құқықтары мәселесіне қатысты ұстанымын сынға алған пікірлерге жауап ретінде жасалды, деп хабарлайды Orda.kz РБК-ға сілтеме жасап.

Оқиға АҚШ-тың БҰҰ-ның адам құқықтары жөніндегі жоғарғы комиссары Фолькер Тюрк өкілеттігін тағы төрт жылға ұзартуға қарсы шыққаннан кейін болды. Оның қайта тағайындалуын 144 ел қолдап дауыс берсе, 10 мемлекет, соның ішінде АҚШ қарсы болды.

Бұған дейін Женевадағы Францияның БҰҰ жанындағы миссиясы Вашингтонның бұл шешімін сынға алып, АҚШ-ты «бір кездері адам құқықтарының шамшырағы болғанымен, қазір Ресей, Солтүстік Корея, Никарагуа және Мали сияқты елдермен бір қатарға түсті» деп мәлімдеген.

Өз кезегінде АҚШ-тың БҰҰ жанындағы елшісінің орынбасары Дэн Негреа Парижді «моральдық тұрғыда өзін жоғары қою» және басқа елдерге «ақыл айтуға» тырысу деп айыптады. Оның айтуынша, Вашингтон Франция өз көзқарасын өзгертпейінше, оның «саясиланған риторикасын» тыңдауға ниетті емес.

Сондай-ақ АҚШ-тың БҰҰ-дағы елшісі Майк Уолтц Францияны «адам құқықтарын ең көп бұзатын елдердің кейбірін қолдайды» деп сынап, АҚШ, Ұлыбритания және Израиль секілді демократиялық мемлекеттерді сынға алатын тұлғаны қолдап дауыс бергенін айтты.

Америка делегациясы залдан шығып кеткеннен кейін сөз алған Францияның БҰҰ жанындағы елшісі Жером Боннафон бұл оқиғаға тікелей түсініктеме бермеді. Ол Франция халықаралық қауіпсіздік, адам құқықтары және ұйымның тәуелсіздігін сақтау бағытында БҰҰ қызметін қолдауды жалғастыратынын мәлімдеді.

Оқи отырыңыз:

• Иран: АҚШ-қа 20 млрд доллардан астам шығын келтірдік
• Қытай АҚШ-пен соғыс және Тайваньды басып алу сценарийлерін макет арқылы пысықтауда
• АҚШ пен Ұлыбритания Ормуз бұғазындағы кеме қатынасын қорғау мақсатында халықаралық коалиция құрмақшы