Ұлытаудағы ауыл спортшылары спартакиадасы төбелеспен аяқталды

Ұлытау облысы Жаңаарқа ауданының Сәкен Сейфуллин ауылдық округінде өткен XXIII дәстүрлі ауыл спортшылары спартакиадасында жанжал шығып, оның соңы төбелеске ұласты, деп хабарлайды Orda.kz.

Оқиғаның видеосы әлеуметтік желілерде тарады. Жарияланған мәліметке сәйкес, спартакиаданың салтанатты ашылуына Жаңаарқа ауданының әкімі Қайрат Қожықаев, құрметті қонақтар, ауылдық округтердің спортшылары мен тұрғындары қатысқан. Алайда көпшілік жиналған шара барысында жастар арасында жанжал туындап, кейін ол жаппай төбелеске айналған.

Куәгерлердің айтуынша, оқиға кезінде қоғамдық тәртіпті бақылап, жағдайды реттеуі тиіс жауапты тұлғалар мен құқық қорғау органдары өкілдері көрінбеген. Осыған байланысты тұрғындар мұндай ауқымды іс-шарада қауіпсіздік шараларының жеткілікті деңгейде ұйымдастырылмағанына алаңдаушылық білдірді.

«Жаңаарқа ауданында өткен спартакиада кезінде болған жанжал фактісі бойынша бұзақылық бабымен қылмыстық іс қозғалды. Жанжалға қатысқан барлық тұлғалар анықталып, ұсталды. Қазіргі уақытта оқиғаның барлық мән-жайын анықтауға бағытталған тергеу әрекеттері жүргізілуде» деп полиция департаменті пікір білдірді. 

Оқи отырыңыз:

Боралдайда 65 адам сушиден уланды: Санитарлық дәрігерлер асүйден не тапты?

Алматыдағы «Гелик» қатысқан жол апатынан аман қалған әйелдің жағдайы белгілі болды