Бектенов Алматы облысы әкіміне: «Сізді тыңдасақ – өзіңізден басқаның бәрі кінәлі екен»

Премьер-министр Олжас Бектенов Алматы облысының әкімі Марат Сұлтанғазиевтің тұрғын үй-коммуналдық шаруашылық саласындағы инвестициялық жобаларды іске асыру жөніндегі есебіне көңілі толмағанын осылай білдірді, деп хабарлайды Orda.kz.       

Үкімет отырысында Бектенов кейбір өңірлерде инвестициялық жобаларды жүзеге асыру қарқыны төмен екеніне тоқталды.

«Алматы облысын тыңдайық. Өңірде бүгінге дейін жобалар бойынша келісімшарттар жасалмаған. Себебі неде?» – деп сұрады премьер-министр. 

Сұлтанғазиевтің айтуынша, өңірде энергетика және коммуналдық секторды жаңғырту аясында жалпы құны 6,2 млрд теңге болатын 10 жобаны іске асыру жоспарланған. Жылумен қамту бойынша жоспар 50 пайызға орындалған, ал сумен жабдықтау саласында қиындықтар туындаған.

«Сумен жабдықтау және су бұру бағытында жалпы құны 2 млрд теңге болатын екі жоба қарастырылған. Конкурстық рәсімдер басталғанымен, прокуратураның ұсынысы бойынша олардың қорытындысы жойылып, жауапты тұлғалар тәртіптік жауапкершілікке тартылды. Сонымен қатар Қаржы министрлігі бұл жобаларды басым емес тізімге енгізіп, қаржыландыруды тоқтата тұруды ұсынды. Соған қарамастан, конкурс қайта жарияланды», – деп баяндады облыс әкімі. 

Сөйтіп, ол премьер-министрден аталған жобаларды басым емес жобалар тізімінен алып тастау туралы Қаржы министрлігіне тапсырма беруді сұрады.

Алайда Бектенов бұл жауапқа қанағаттанбады.

«Сізді тыңдасақ – бәрі кінәлі, тек өзіңіз емес. Жұмысты жеделдетіңіз», – деп ескерту жасады. 

Еске салсақ, былтыр Алматы облысының әкімі Марат Сұлтанғазиев Талғарға қатысты «қылмыс ошағы» туралы пікірлер шындыққа жанаспайтынын айтып, «Талғар — ең қауіпті аудан емес» деген болатын. 

Журналистер сұрағына жауап берген әкім неге дәл осы аудан жиі қылмыстық жаңалықтар тақырыбына айналатынын түсіндірді. Оның сөзінше, шынайы статистика басқаша.

Оқи отырыңыз:

• Түркістан облысында мәслихат депутатына қатысты Қытай азаматының арызы бойынша тексеру жүріп жатыр
• Желі мәдениеті: Тоғыз треш-стример жауапкершілікке тартылды
• Арасында қытайлықтар бар: ШҚО-да заңсыз алтын өндіріп жүргендер құрықталды