ШҚО-дағы арал 10 млн долларға сатылатыны рас па?

Шығыс Қазақстан облысының жер қатынастары басқармасы интернетте тараған аралды 10 млн долларға сату туралы хабарландыруға қатысты түсініктеме берді, деп хабарлайды Orda.kz.       

Бұған дейін әлеуметтік желілерде арал сатылатыны жөнінде жарияланым пайда болған еді. 

«Арал сатып алу мүмкіндігі күн сайын кездесе бермейді. Жеке меншіктегі 22,5 гектар жер телімі бірыңғай инвестициялық жоба ретінде ұсынылады. Нысанның құны 10 млн АҚШ долларына бағаланған» деп жазылған хабарламада.

Алайда кейінірек республикалық БАҚ-тың бірінде арал иесі Совет Мұхитовтың бұл нысан сатылмайтынын айтқан видеосы тарады. Осыған байланысты ШҚО жер қатынастары басқармасы БАҚ сауалына жауап берді.

«Аталған арал Шығыс Қазақстан облысы Алтай ауданындағы Бұқтырма су қоймасы аумағында орналасқан. Ауданаралық экономикалық соттың шешімі негізінде Алтай ауданы әкімдігінің 2006 жылғы 8 тамыздағы № 2595 қаулысымен жер телімі жеке меншікке берілген. Жер телімін сатып алу құны мен оның сатылым бағасы туралы мәлімет басқармада жоқ»,— деді басқарма басшысы Надежда Михейлис.

2008 жылы арал аумағы төрт жер теліміне бөлінген: кадастрлық нөмірлері 05-070-033-027 (161,1 га), 05-070-033-030 (24,7 га), 05-070-033-028 (24,1 га) және 05-070-033-029 (15,1 га).

«Жер телімдерінің нысаналы мақсаты «тауарлы ауыл шаруашылығы өндірісін жүргізу» деп көрсетілген. Қазақстан Республикасы Жер кодексінің 24-бабына сәйкес, жер учаскесіне жеке меншік құқығын толық төлеген тұлға Қазақстан Республикасының заңнамасымен тыйым салынбаған кез келген мәміле түрлерін жасауға құқылы» , — деді Михейлис.  

Оқи отырыңыз:

• Қазақстан мен Ресей президенттеріне сауда және логистика саласындағы жобалар таныстырылды
• Үкімет ЖЭО-лардағы жөндеу жұмыстары туралы айтты