Тағы бір жануар адамның құрбаны болды: «Аузынан көбік аққан ит»

Алматы облысында итті арқанмен жол бойы сүйреген көліктің видеосы желіде таралды. Куәгерлердің айтуынша мұндай «серуеннен» байғұс иттің аузынан көбік шыққан, деп хабарлайды ORDA Inalmaty.kz-ке сілтеме жасап.

Жүргізуші көліктің жүк салғышына ірі тұқымды итті байлап, жүріп қайтқан. Бейне авторы оқиғаның Бәйтерек ауылында болғанын көрсеткен.

«Иттің аузынан көбік шығып жатыр, өзім де қорқып кеттім. Не істеп жатқанын білейін деп барғанда, итті солай тасымалдап жүргенін айтты», - делінген хабарламада.

Алматы облысы полиция департаментінің баспасөз қызметі Еңбекшіқазақ ауданы Бәйтерек ауылының 52 жастағы тұрғыны анықталып, полиция бөліміне жеткізілгенін хабарлады.

«Қазіргі уақытта істің барлық мән-жайлары анықталып жатыр, оның іс-әрекетіне құқықтық баға беріледі», - деп хабарлады департамент.