Ресей мен Әзірбайжан айқасы: Екі елде қарсы тарап азаматтары ұсталды

Бакуде сегіз Ресей азаматы қамауға алынып, төрт айға абақтыға жабылды. Оларға есірткі тасымалы мен интернет алаяқтыққа қатысы бар деген айып тағылған, деп хабарлайды Orda.kz.

Екі мемлекет арасындағы қатынас ушығып тұр. Қазіргі оқиғалар тұтқындау алмасуы сипатында өрбіп жатыр.

«Бакуде шамамен он Ресей азаматы ұйымдасқан қылмыстық топ құрамында деп айыпталып отыр. Олар Ираннан келетін есірткіні тасымалдауға және интернет арқылы жасалған қылмыстарға қатысқан болуы мүмкін» деп жазды Report.az.

Ұсталғандар қатарында IT-кәсіпкер Антон Драчев, IT-маман Сергей Софронов және бағдарламашы Дмитрий Безуглый бар. 1 шілдеде сот олардың сегізін төрт айға қамауға алу туралы шешім шығарды.

Сонымен қатар Екатеринбург қаласында Уралдағы әзірбайжан диаспорасының жетекшісі Шахин Шихлинский ұсталды. Кейін куәгер ретінде босатылды. Шихлинскийге ресми айып әлі жарияланған жоқ.

Сондай-ақ Воронежде этникалық әзірбайжан, кәсіпкер Юсиф Халиловтың үйінде тінту жүргізілген.

Еске салайық, шиеленіс Ресей күштік құрылымдарының Екатеринбургте әзірбайжан диаспорасы өкілдеріне қарсы операциясынан кейін басталған болатын. Салдарынан Сафаровтардың бауырлары көз жұмды. Баку бұл азаматтар азапталып, қасақана өлтірілді деп есептейді. Осыған байланысты Әзірбайжан Бас прокуратурасы азаптау дерегі бойынша қылмыстық іс қозғады.

Көп ұзамай Бакуде Sputnik агенттігінің әзірбайжандық бөлімшесінің директоры мен бас редакторы ұсталды. Жергілікті ақпарат құралдарының мәліметінше, бұл тұлғалар Ресей ФСБ-сына жұмыс істеген болуы мүмкін.