Ең ауыр жаза – 22 жыл: Ақтөбеде төбелес шығарған 10 айыптыға үкім шықты

2024 жылдың мамыр айында Ақтөбеде елді дүрліктірген оқиға болды. Қала күнінен кейін жасөспірімдер екі топқа бөлініп, жаппай төбелес ұйымдастырды. Салдарынан 8 адам жараланып, бір адам көз жұмды. Ақыры 18 жастағы баланың өлімімен аяқталған іске қатысты үкім шықты. Он айыпталушыны сот 11 мен 22 жыл аралығында түрме жазасына кесті, деп хабарлайды Orda.kz.

Қылмыстық іс 77 томнан тұрады. Айыпталушыларға адам өлтіру, қорқытып алу және бұзақылық бойынша айыптар тағылған. Төбелес TikTok-тағы жанжалдан басталып, кейін қару кезену, көлікпен қағу және пышақ сұғу сынды жаншошырлық қақтығысқа ұласқан. Айыпталушылардың бірі 18 жастағы баланың жүрек тұсына пышақ сұққан, ол оқиға орнында көз жұмды.

Ақыры 1 шілде күні Ақтөбе соты 18 жастағы жүрек тұсынан пышақталған бозбаланың өліміне қатысты іске тергеуді аяқтап, үкім оқыды. Сот «адам өлтіру», «қорқытып алу», «қылмысқа дайындалу және қылмысқа оқталу» баптарымен айыпталған 10 адамды сот кінәлі деп таныды. Іс төрт ай қаралды. 

Сот үкімі бойынша:

• Әрсен Нысаналиев - 20 жыл;
• Мухаммад-али Дилшобек - 20 жыл;
• Досымжан Құсманов - 22 жыл;
• Ильяс Саловатов - 15 жыл 6 ай;
• Жанболат Марқабаев - 11 жыл 6 ай;
• Нұрзат Бақтыбаев - 15 жыл 6 ай;
• Руслан Сағынбаев -  15 жыл 6 ай;
• Тимур Есхожин - 15 жыл 6 ай;
• Сұлтан Типаев - 15 жыл 6 ай;
• Әділет Сағынов - 15 жыл 6 ай .

Сот үйқамақта жүрген Руслан Сағынаевты сот залында қамауға алды.

Істі судья Жәнібек Сейтжаппаров, прокурорлар Көшербаева Гүлзира мен Осман Орынбасарұлы қарады. 

«Жәбірленушінің азаматтық талабы ішінара қанағаттандырылсын. Әрсен Нысаналиев,  Мухаммад-али Дилшобекұлынан, Досымжан Құсмановтан әрқайсысынан 6 млн теңге, барлығы 18 млн теңге моральдық зиян, әрқайсысынан 986 384 теңге, барлығы 2 959 152 теңге мүліктік шығын өндірілсін», — деді судья Сейтжаппаров.  

Сотталушылардың барлығынан 150 мың теңгеден 1,5 млн теңгені заң көмегіне кеткен шығынды өндіріп беру міндеттелді.

Жарыссөзде заңды өкілдері мен қорғаушылар айыптаушыларды ақтауды сұрады. Ешкім тағылған айыпты мойындаған жоқ. Үкіммен келіскен жоқ. Апелляциялық шағым түсіретіндерін айтты. 

Еске салсақ, қайғылы оқиға Ақтөбе қаласында 2024 жылы 27 мамырда болды. Жасөспірімдер қала күнінен кейін екі топқа бөлініп төбелескен. Төбелес кезінде 8 адам жарақат алды. Бір адам қаза тапты. 

Автор: Ардақ Ерубаева