Дәурен Абаев Адам Қадыровтың тойына не себепті барғанын түсіндірді

Дәурен Абаев Рамзан Қадыровтың 17 жастағы ұлының үйлену тойына барғанын растады, деп хабарлайды Orda.kz.

28 маусым күні Грозный маңындағы Ахмат Юрт ауылында Рамзан Қадыровтың 17 жастағы ұлы Адамның үйлену тойы өтті. Тойға Қазақстанның Ресей Федерациясындағы елшісі Дәурен Абаев қатысқаны туралы ақпарат шыққан еді.

Orda.kz журналисі Ресейдегі Қазақстанның елшісі Дәурен Абаевқа хабарласып, оның Адам Қадыровтың үйлену тойына расымен барған-бармағанын сұрады. Сондай-ақ, тілгі бұл шараға оның жеке тұлға немесе Қазақстан атынан ресми дипломат ретінде қатысқанын нақтыламақ болды.

«Мен тек Мәскеудегі елші ғана емеспін, жалпы Ресей Федерациясындағы елшімін. Сол себепті аймақтарға да үнемі барамын. Қазақ пен шешен халықтарының арасында өте тығыз, достық қатынастар бар. Мыңдаған шешеннің Қазақстанға депортацияланғанын біз ұмытқан жоқпыз. Сол сияқты, қазақ халқы қиын жағдайға тап болған шешендерді тастамай, қол ұшын созғанын шешен ұлты да ұмытпады. Мен ең алдымен осы достықтың белгісі ретінде бардым», — деді Абаев.

Айта кетейік, Адам Қадыров — Рамзан Қадыровтың кіші ұлы. Жасы — 17-де. 2023 жылы ол Құранды өртегені үшін ұсталған Никита Журавелді тергеу изоляторында ұрып-соғып аты шыққан еді. Осыдан кейін Ресейдің бірнеше өңірі оған түрлі марапаттар табыстаған.