AZAL ұшағын жоюға бұйрық берген Ресей капитанының түсіндірме қағазы пайда болды

Биыл 1 шілдеде  Әзірбайжан БАҚ өкілдері ресей капитаны Дмитрий Паладичуктың түсіндірме жазбасын жариялады. Құжатқа қарасақ, 2024 жылдың желтоқсанында ол Грозныйға жасалған дрон шабуылы кезінде әуе нысанын жою туралы бұйрық берген. Олар бұл әңгіме Бакуден Грозныйға ұшқан AZAL ұшағы туралы болды деп топшылап отыр, деп хабарлайды Orda.kz.

The Insider мәліметінше, түсіндірме хат шынайы болуы мүмкін.

Құжатқа зер салсақ, 25 желтоқсан күні таңертең Грозныйға дрондар жасаған жаппай шабуыл кезінде капитан дрон деп күдіктенген нысанды байқаған. Бірақ тұманнан оны анық көру мүмкін болмаған. Ол нысанның биіктігі мен жылдамдығын 51-дивизияның командалық пунктіне жеткізген. Көп ұзамай жою туралы бұйрық түсіп, Паладичук оны операторға берген. Бірінші зымыран нысанаға тимегеннен кейін, ол қайта соққы жасау туралы бұйрық берген.

Журналистер Дмитрий Паладичуктың шынымен де Ресейдің әуе шабуылына қарсы қорғаныс әскерінде, соның ішінде Новосібірдегі әскери орындарда қызмет еткенін анықтады.

Редакцияға жақында болған телефон әңгімесінің аудиожазбасы келіп түсті. Сол әңгімеде Паладичук «ұшаққа оқ атылғаннан кейін» басшылықтың талабымен құжатты өзі жазғанын растаған. Себебі басшылық «талап етті». Ол жазбадағы өз қолтаңбасының ерекшеліктерін де атап өткен. Атап айтқанда, «ё» әрпінің ерекше жазылуын айтып, өз жазуы екенін мойындаған. Басылым оның дауысы бұрын Әзірбайжан БАҚ-тары жариялаған бейнежазбадағы дауысқа ұқсас екенін де ескертеді. Ол бейнежазбада оқ ату туралы бұйрық берілгені айтылған.

Сонымен қатар, The Insider капитан көрсеткен нысан сипаттамалары мен украин дрондарының әдеттегі параметрлері арасында сәйкессіздік барын атап өтті. Паладичуктың айтуынша, нысан шамамен сегіз шақырым биіктікте, секундына 120 метр жылдамдықпен қозғалған. Бұл көрсеткіштер көп дрондардан әлдеқайда жылдам. Журналистердің пайымдауынша, әскери қызметкерлерде бұл нысанның жолаушы ұшағы екенін ажырата алатындай жеткілікті деректер болған.