«Буындырып тастаймын»: Екібастұзда ойын алаңындағы балаға бір әйел шабуыл жасады

Әлеуметтік желілерде Екібастұздағы ойын алаңдарының бірінде болған оқиғаның бейнежазбасы тарап кетті. Бейнежазбада бір әйел балаға балағат сөздер айтып, қорқытып, оған қол көтеріп жатқан сәті көрінеді, деп хабарлайды Orda.kz.

Бейнеде қорыққан балалардың бірі жылап, бірі қашып барады. Ал әйелдің былай деп айқайлағаны анық естіледі:

«Ол саған не істеді? Не істеді саған? (Баланы ұрып). Қазір сені буындырып тастаймын».

Қала әкімінің орынбасары Бибігүл Иманғалиеваның айтуынша, бұл факт бойынша 30 маусым күні процессуалдық шешім қабылдау үшін екі материал тіркелген.

«Әйелдің кәмелетке толмаған балаға дене жарақатын келтіру фактісі бойынша полиция тексеріс бастады. Сот-медициналық сараптама тағайындалды, оның нәтижесі бойынша процессуалдық шешім қабылданады»,  деп хабарлады Екібастұз полициясы.

Еске сала кетсек, Алматы облысында 10 жастағы Максим Головачёв есімді оқушыға алаңда ойнап жүрген сәтте бірнеше ірі төбет шабуыл жасап, жарақаттады.  Қазір ол жансақтау бөлімінде, жағдайы өте ауыр.