«Иттерім қымбат»: Баланы төбеттерден қорғаған адамнан иттердің иесі өтемақы талап етті

Баланы төбеттерден қорғап қалған Сербек Сақайбековтен иттердің иесі өтемақы талап етіп отыр, деп хабарлайды Orda.kz.

Алматы облысында 10 жастағы Максим Головачёв есімді оқушыға ойын алаңқайында ойнап жүрген кезде бірнеше ірі төбет шабуыл жасап, ауыр жарақаттаған еді. Бет-аузы тырналған, иттер тістемеген жері қалмаған. Бала бір құлағынан айырылды.

Максимге үш ит шабуыл жасаған. Екі неміс овчаркасы мен бір питбуль. Куәгерлер айқайлап, иттерді үркітпек болған. Бір овчарка қашып кеткен, ал екеуі – балаға жабысқан күйі, жұлмалап, талай берген. Баланы 66 жастағы Сербек Сақайбеков құтқарып қалған.

Алайда оңалту орталығының иесі иттері үшін Сақабековтен өтемақы талап етіп отыр.

«Маған хабарласып: «Екі иттің ақшасын төле» деді. Сонда иттер қымбат екен деп қарап тұруым керек пе?», – деп ашынды тұрғын.

Алматы облысының полициясы ер адамға ешқандай жаза қолданылмайтынын мәлімдеді.

«Желіде тараған, иттердің шабуылын тоқтатқан жергілікті тұрғынның жауапкершілікке тартылғаны жөніндегі ақпарат шындыққа жанаспайды. Бұл азаматқа қатысты ешқандай процессуалдық шешім қабылданған жоқ. Қазақстан Республикасы Қылмыстық кодексінің 32-бабына («Қажетті қорғаныс») сәйкес, оның әрекеттері өзін-өзі қорғау мақсатында жасалған заңды әрекет. Заңға сәйкес, өмірге, денсаулыққа немесе мүлікке нақты қауіп төндірген шабуылды тойтару кезінде қажетті қорғаныс жағдайында зиян келтіру – қылмыстық жазаға жатпайды», деп түсіндірді полиция өкілдері.

Еске сала кетейік, 2024 жылы кесар тілігін жасатып босанған бір әйелдің ішінде таңғыш мата қалып қойғаны белгілі болған еді. Соның кесірінен 9 ай бойы денсаулығы сыр беріп, азап көрген әйелге ақыры ота жасалып, таңғыш мата алынып тасталды.