«Құлағын жұлып алды»: Алматы облысында 10 жастағы баланы төбеттер талап тастады

Алматы облысында 10 жастағы Максим Головачёв есімді оқушыға алаңда ойнап жүрген сәтте бірнеше ірі төбет шабуыл жасап, ауыр жарақаттады. Қазір ол жансақтау бөлімінде жатыр, жағдайы өте ауыр, деп хабарлайды Orda.kz.

Қанды оқиға Қарасай ауданына қарасты Жалпақсай ауылында болған. Orda.kz басылымына келіп түскен ақпарат бойынша балалар әдеттегідей футбол ойнап жүргенде, жақын маңдағы оңалту орталығы жанындағы үйден қашып шыққан үш ірі ит — бір питбуль мен екі ротвейлер алаңға баса-көктеп кіріп, баланы талап тастаған.

Куәгерлердің айтуынша, иттер баланы жерге жығып, басы мен денесін жанталаса қауып, талап жұлмалаған. Қорқынышты көрініске куә болған ересектердің бірі өзімен алып жүретін пышағын алып, иттердің екеуін өлтірген. Ал үшіншісі сол сәтте қашып кеткен.

Зардап шеккен бала — Алмалыбақ ауылындағы мектеп-гимназияның 4-сынып оқушысы. Дәрігерлердің айтуынша, оның жағдайы өте ауыр: «Құлағы жұлынып кеткен, басы мен денесі жырылған, терең жарақаттары бар».

Қазіргі уақытта құқық қорғау органдары оқиғаның нақты мән-жайын анықтап жатыр.

Полиция бұл оқиға бойынша Қылмыстық кодекстің «Абайсызда адам денсаулығына ауыр зиян келтіру» бабымен іс қозғаған. Бірақ, ақпарат құралдарының жазуынша, иттердің иесі өз кінәсін мойындаудан бас тартып отыр.

«Қазір куәгерлерден жауап алынып жатыр. Оқиғаның барлық мән-жайын жан-жақты, толық және объективті түрде анықтауға бағытталған тергеу әрекеттері жүргізіліп жатыр. Қажетті сараптамалар тағайындалды. Олардың нәтижесіне қарай нақты процессуалдық шешім қабылданады»,  деп мәлімдеді Алматы облыстық полиция департаментінің баспасөз қызметі.

Еске салсақ, бұған дейін 13 жыл бойы тұрмыстық зорлық көрген Қамар Алпамыс есімді әйелдің ісі қоғамда үлкен резонанс тудырған еді. Ол соққы салдарынан мүгедек болып қалған. Сот күйеуін кінәлі деп танып, үкім шығарды.