Шерзат ісі: Азамат Тоқтаубаевтың бір емес, төрт рет істі болғаны анықталды

Талдықорғанда 16 жасар Шерзат Полаттың өліміне қатысты сот өтіп жатыр. Бүгін сот отырысында прокурор Азамат Тоқтаубаевтың неліктен пробациялық шешімді бұзғанын сұрады. Оның бұған дейін бір емес, төрт рет істі болғаны анықталды, деп хабарлайды Orda.kz.

Азамат Тоқтаубаев өзінің пробациялық бақылауда емес үйқамақта болғанын және денсаулығына байланысты дәріханаға баруға тура келген соң, сыртқа шығуға мәжбүр болғанын айтты. Осылайша өзінің заң бұзғанын мойындады.

Азамат Тоқтаубаев Шерзат Полат ісі бойынша уақытша ұстау изоляторында отырғанда үйқамақта отырған ісі бойынша 7 жылға үкім шыққанын айтты.

Азамат Тоқтаубаев — 2017-2018 жылы,  2022 жылы және 2024 жылдары істі болған. Оған соңғы ісінде 7 жылдық үкім шыққаны белгілі болды.

Еске сала кетсек, 4 қазан күні Талғардағы «Қамажай» дүкеніне бір топ адам келіп, дау туып соңы дүкен иесінің баласы 16 жастағы Шерзаттың өлімімен аяқталған еді. 

12 қазан күні Азат ауылындағы марқұм Шерзаттың үйі өртеніп кетті.

9 желтоқсанда оқиға орнында болған жәбірленуші Нұрғанат Ғайыпбаевтың денесі  Шерзаттың зиратының маңынан табылды. 

Еске сала кетсек, бұған дейін Азамат Тоқтаубаевтың ағасы Нұрбол Тоқтаубаев жауап берген болатын. Оның айтуынша, оқиға кезінде досы Дархан көмек сұрап, көзінен жарақат алғанын айтып, дүкенге шақырған. Ол өзін және інісі Азамат Тоқтаубаевты тергеушілердің ұрып-соққанын, қысым көргенін айтып, алғашқы жауабынан бас тартты. 

Ал оның алдында Дархан Әскентай сот алдында жауап берген болатын. 4 қазан күні марқұм Шерзат оны жұдырықпен бір ұрған соң, Дархан Әскентай осы Нұрбол Тоқтаубаевты шақырған болатын.

Еске сала кетсек, ІІМ бірінші орынбасары Бауыржан Әленов пен прокурор Берік Адамов және тергеу ісін қолға алған Самат Айысов 15 қазан брифинг өткізген. Олардың артынан ұсталғаны мәлім болды. Ұсталғандардың кім екенін сол брифингте белгілі болды.