Ресейге тыңшылық жасағандар Рысқалиевті де аңдыған

Лондонның орталық қылмыстық сотында  «Ресейдің барлау агенттіктерінің тапсырысы бойынша тыңшылық жасады» деген айып тағылған болгариялық азаматтардың соты жалғасып жатыр, деп хабарлайды Orda.kz BBC-ге сілтеме жасап. 

Алдын ала мәліметтерге сүйенсек, күдіктілер Германиядағы америкалық әскери базаны тінтіп, Ресей билігінің қарсыластарын, сонымен қатар журналистер Кристо Грозев пен Роман Доброхотовты аңдыған. Бірақ сотта 33 жастағы Катрин Иванова, 30 жастағы Ваня Хаберова және 39 жастағы Тихомир Иванчев айыптаулардың бәрін жоққа шығарады. Ал күдіктілердің екеуі — 46 жастағы Орлин Русев пен 43 жастағы Бизер Жамбазов тыңшылық жасағанын мойындады.

Тергеу мәліметі бойынша, сотталушылар бұл іспен 2020 жылдың тамызынан 2023 жылдың ақпанына дейін айналысқан. Прокурорлар топтың Ұлыбританияда, Еуропаның басқа елдерінде де жұмыс істегенін мәлімдеді. Топты Австрия азаматы және Wirecard компаниясының бұрынғы операциялық директоры Ян Марсалек есімді адам басқарды. Янның өзі Германияда алаяқтық жасады деген айыппен іздестірілген.

Сонымен қатар сотта күдіктілердің Ұлыбританияға қашып, саяси баспана алған қазақстандық саясаткер Бергей Рысқалиевті де аңдығаны айтылды.

Айыптау мәліметтері бойынша, күдіктілер Ресейдің Қазақстанмен байланысын нығайту үшін оның билігінің қарсыласын қудалаудан пайда іздеген болуы мүмкін. 

Бергей Рысқалиев 2006-2012 жылдары Атырау қаласы мен Атырау облысының әкімі қызметін атқарған. 2012 жылы оның бауыры, мәжіліс депутаты Арманжан Рысқалимен бірге шетелге қашқаны белгілі болды. 2013 жылы экс-әкімге «аса ірі көлемдегі бюджет қаржысын жымқырды және және қылмыстық топ құрды» деген айып тағылды. 2019 жылы Қазақстан соты Бергей Рысқалиевті 17 жылға, оның ағасы Арманжан Рысқалиевті 16 жылға сырттай соттады.

Лондонның орталық қылмыстық сотының мәліметінше, күдіктілердің тағы бір операциясы Лондондағы Қазақстан елшілігіне қарсы бағытталды. 2022 жылдың қыркүйегінде олар «жалған наразылық акциясын» ұйымдастырып, содан кейін оның «ұйымдастырушылары» туралы деректерді Қазақстан билігіне беруді көздеген. Сонымен қатар Болгария азаматтары 2022 жылдың соңында Штутгарттағы американдық әскери базаны бақылауды ұйымдастырды деп айыпталуда. Базаны қадағалау кезінде олар объектідегі адамдар туралы ақпарат алуға мүмкіндік беретін озық технологияларды қолданған.