Алматы – Қорғас тасжолындағы жантүршігерлік жол апаты: Тағы бір адам жан тапсырды

Алматы облысында Алматы – Қорғас тасжолында болған ауыр жол-көлік оқиғасынан қаза тапқандар саны төрт адамға жетті, деп хабарлайды Orda.kz облыстық денсаулық сақтау басқармасына сілтеме жасап.

Ведомствоның баспасөз қызметінің мәліметінше, 2026 жылғы 23 маусымда Шелек ауылындағы Қағазбаев көшесі маңындағы «Бетонка» автожолында болған жол апаты салдарынан аудандық ауруханаға 7 адам медициналық көмекке жүгінген.

Қарап-тексеруден өтіп, қажетті медициналық көмек көрсетілгеннен кейін бір зардап шегуші тұрғылықты жері бойынша амбулаторлық ем алуға жіберілді.

2025 жылы туған сәби жағдайы тұрақтандырылған соң әрі қарай мамандандырылған ем алу үшін облыстық балалар клиникалық ауруханасына ауыстырылды.

«Қазіргі уақытта үш науқас травматология бөлімінде ем қабылдап жатыр, олардың жағдайы орташа ауыр деп бағалануда.Тағы бір науқас анестезиология, жансақтау және қарқынды терапия бөлімінде жатыр, жағдайы өте ауыр. Өкінішке қарай, бір зардап шегуші ауыр жарақаттардың салдарынан көз жұмды», деп хабарлады денсаулық сақтау басқармасы. 

Ведомство барлық ауруханаға жатқызылған науқастарға толық көлемде қажетті медициналық көмек көрсетіліп жатқанын атап өтті.

Бұған дейін Алматы облыстық полиция департаменті апат 23 маусым күні Алматы – Шелек – Қорғас автожолының 132-шақырымында болғанын хабарлаған. Алдын ала мәлімет бойынша, Haval автокөлігінің жүргізушісі қарсы қозғалыс жолағына шығып кетіп, Audi 100 көлігімен соқтығысқан. Апат салдарынан Audi көлігінің жүргізушісі мен екі жолаушысы оқиға орнында  қаза тапқан.

Оқи отырыңыз:

• Алматы – Қорғас тас жолындағы бұзылған бетон көліктерге жаппай зақым келтіріп жатыр
• Қазақстан мен Қытай шекарасында бірнеше өткізу пункті жабылды
• Алматыда жер астынан шыққан өрт жұрттың зәресін алды: Полиция себебін айтты