Футболдағы дау: Футболшы мен төреші матчтардан шеттетіліп, клубқа 400 АЕК айыппұл салынды

25 маусым 2026 18:03 Ләззат Нұрсапақызы

Фото: Әлеуметтік желіден

Қазақстан футбол федерациясы дау шыққан «Елім-ай» – «Ордабасы» матчы үшін клубты, бапкерді және төрешіні жазалады, деп хабарлайды Orda.kz.

Қазақстан футбол федерациясының Бақылау-тәртіптік және этика комитеті Премьер-лиганың 13-туры аясында өткен «Елім-ай» мен «Ордабасы» арасындағы матч бойынша шешім шығарды.

Кездесу 14 маусым күні Семейде өтіп, шымкенттік клубтың 3:1 есебімен жеңісімен аяқталған болатын.

«Елім-ай» клубының бас бапкері Андрей Карпович қатарынан төрт ойынға шеттетілді. ҚФФ мәліметінше, ол «төрешінің әрекеттерімен агрессивті түрде келіспейтінін білдіріп, соның салдарынан ойыншылар, клуб өкілдері мен төрешілер тобы арасында жанжал туындаған».

Сондай-ақ «Елім-ай» футболшысы Жан Әли Пайруз да төрт матчқа шеттетілді. Бұған оның алаңның ортасында бас төрешіге «физикалық қысым көрсетуге әрекет жасауы» себеп болған. Карпович пен Пайруз үшін дисквалификация мерзімі 15 маусымнан бастап есептеледі.

Клубтың басқарушы директоры Федор Симинидиге «Елім-ай» қатысатын матчтар өтетін стадиондарға баруға тыйым салынды. Бұл шектеу 2026 жылдың 24 маусымынан 1 қазанына дейін күшінде болады. Сонымен қатар оған 100 айлық есептік көрсеткіш (АЕК) көлемінде айыппұл салынды.

ҚФФ дерегінше, Симиниди алаңға жүгіріп шығып, матчтың ресми тұлғасына агрессия танытқан, ал ойыннан кейін төрешілердің киім ауыстыратын бөлмесіне кіріп, балағат сөздер айтып, төрешіге қоқан-лоқы жасаған.

«Елім-ай» клубының өзі де айыппұл арқалады. Жанкүйерлердің «матчтың ресми тұлғаларын қорлап айқайлауы және төрешіге тиген заттарды алаңға лақтыруы», сондай-ақ «бөгде адамның төрешілер бөлмесіне заңсыз кіруі» үшін клуб 300 АЕК төлеуге міндеттелді.

Бұдан бөлек, команданың «тәртіпсіз мінез-құлқы» үшін тағы 100 АЕК айыппұл салынды. Осылайша, клубқа салынған жалпы айыппұл көлемі 400 АЕК болды.

Матчтың бас төрешісі Арман Исмуратов та жазасыз қалған жоқ. ҚФФ оны «ойыннан кейін «Елім-ай» өкілдеріне қатысты орынсыз әрекеттері мен балағат сөздері үшін» 2026 жылдың 24 маусымынан 1 қазанына дейін қызметінен шеттетті.

Сонымен қатар сот оған 5 тәулікке қамау жазасын тағайындады.

Еске салсақ, Қазақстанда жоғары лиганың кәсіби футбол клубтарын ауқымды жекешелендіру жүріп жатыр, оның мақсаты — мемлекеттік қаржыландырудан жеке инвестицияларға көшу. Orda.kz тілшісі осы футбол клубтарының жекелендіру жағдайын зерделеп, назарларыңызға ұсынды.

Оқи отырыңыз:

Жаңалықтар

барлық жаңалықтар