Тоқаев Венесуэладағы жойқын жер сілкінісіне қатысты көңіл айту жеделхатын жолдады

Мемлекет басшысы Венесуэла президентінің міндетін атқарушы Делси Родригеске көңіл айту жеделхатын жолдады, деп хабарлайды Orda.kz.       

Қазақстан Президенті Қасым-Жомарт Тоқаев Венесуэладағы жойқын жер сілкінісі салдарынан көптеген адамның қаза табуына және жарақат алуына байланысты Делси Родригеске көңіл айтты.

«Осындай ауыр кезеңде қайғы-қасіреттеріңізге ортақтасып, Сізге, жақындарынан айырылған отбасыларға, сондай-ақ достас Венесуэла халқына көңіл айтамын. Табиғи апаттан қайтыс болған жандардың туыстарының сабырға келіп, болаттай берік болуын, ал жарақат алған азаматтардың тез арада сауығып, отбасыларына аман-есен оралуын тілеймін» деп жазылған жеделхатта. 

Еске салсақ, Венесуэлада бір минутқа жетпейтін уақыт ішінде магнитудасы 7,2 және 7,5 болатын екі күшті жер сілкінісі болды.   Ел астанасы Каракаста бірнеше ғимарат қирап, билік төтенше жағдай режимін жариялады.

АҚШ Геологиялық қызметінің алдын ала бағалауынша, апат салдарынан қаза тапқандар саны 10 мыңнан 100 мың адамға дейін жетуі мүмкін. Мұндай сценарийдің ықтималдығы 44 пайыз деп аталып отыр.

Сондай-ақ жер сілкінісінен келген экономикалық шығын Венесуэланың жалпы ішкі өнімінің 1–5 пайызына тең болуы мүмкін.

 Бүгін Венесуэлада болған күшті жер сілкінісі салдарынан  қаза тапқандар саны шамамен 200 адамға жеткені белгілі болды. Мыңнан астам адам жарақат алды, ал тағы 10 мыңнан астам адам хабар-ошарсыз кеткендер қатарында болуы мүмкін.

Ал Қазақстанның Сыртқы істер министрлігінде республика азаматтарынан дипломатиялық өкілдіктерге ешқандай өтініш түспегенін хабарлады.

Оқи отырыңыз:

• Венесуэлада болған жер сілкінісінен қаза тапқандар саны 200-ге жуықтады
• Тоқаев: Журналистер қауымы жаңа Ата заңымыздың тең авторларының бірі
• Венесуэла жағалауында магнитудасы 7,1-ге тең жойқын жер сілкінісі болды