Қаңтар оқиғасында азаматтарды Күдебаевтың қатысуымен азаптаған – прокурор

Прокурор қаңтар оқиғасы кезінде азаматтарды Алматы облысы полиция департаментінің бастығы Серік Күдебаевтың қатысуымен азаптағанын айтты.

Бүгін бұрынғы генерал 10 жыл мерзімге сотталып, құқық қорғау және мемлекеттік органдарда лауазымды қызметте жұмыс істеу құқығынан айырылды.

«Бүгін Күдебаевқа қатысты қылмыстық істі қарау аяқталды. Күдебаев лауазымдық өкілеттігін асыра пайдаланғаны үшін және қаңтар оқиғасы кезінде азаматтарды азаптағаны үшін айыпталды. Ол жаппай тәртіпсіздік кезеңінде өзінің тікелей міндеттеріне қарамастан қызметкерлеріне полиция ғимаратынан кетуге заңсыз бұйрық берді және өзі де қала аумағынан шығып кетті. Нәтижесінде қоғамдық тәртіп бұзылды, әкімдік, полиция басқармасының ғимараттары, сондай-ақ Sulpak сауда орталығы зақымданды»,- деді прокуратура өкілі.