Қаңтар айында Ресейде ішінара жұмылдырудың екінші кезеңі басталуы мүмкін 

Қаңтарда Ресейдегі жұмылдырудың кезекті толқыны басталады, деп хабарлайды «Можем объяснить» Telegram арнасы әртүрлі аймақтардың әскери комиссариаттарындағы бір біріне қатысы жоқ үш дереккөзге сілтеме жасап.

Арнаның хабарлауынша, аймақтардағы әскери комиссариаттарға Украинадағы соғысқа жұмылдыру бойынша қарқынды жұмысты бастау туралы бұйрық Қорғаныс министрлігінен түскен. Билік жұмылдыруды ресми түрде жариялауды жоспарлап отырған жоқ.

Дереккөз департамент әскери комиссариаттардың алдына шақыру қағаздарын жаппай тарату және тапсыру, сондай-ақ әскерге шақырылғандардың тұрғылықты жеріне рейд жүргізу міндетін қойған деп хабарлады.

Telegram арнаға Санкт-Петербург комиссариатындағы дереккөздің хабарлауынша, әскери комиссариаттарға «қаңтар мен ақпан айларында жұмыс көп болатыны» ескертілген.

Мәскеу комиссариатындағы дереккөз қызметкерлерге «әскери міндеттілер мен келісім-шарттағылардың  істерін қарап, оларға шақыру қағазын жіберіп, оларды жұмылдыру жұмыстарына тартуға» бұйрық берілгенін қосты.

«Не істеу керек екені белгісіз. Ресми түрде жұмылдыру аяқталмады. Ал қазір барлығы аймақтарға көшірілді. Бірақ кенеттен қателіктер орын алса (және олар міндетті түрде болады), онда әскери комиссариаттардың қарапайым қызметкерлері мен олардың бастықтары жауап береді» деп түсіндірді солтүстік-батыстағы облыстардың бірінің әскери комиссариатындағы дереккөз.

Бұған дейін Украина Қарулы Күштерінің Бас штабы 10 желтоқсаннан бастап Ресейде армияға «жасырын мобилизацияның» жаңа толқыны басталуы мүмкін деп мәлімдеген.

Сондай-ақ «Верстка» Мемлекеттік Думадағы және Президент Әкімшілігіндегі өз дереккөздеріне сілтеме жасай отырып, жұмылдырудың екінші толқыны туралы жазды.