Парижде Францияны азат етуге көмектескен қазақ партизандарының аруағына құрмет көрсетілді

Парижде Францияны азат етуге қатысқан қазақ партизандары — Қадам Жұманиязовтың, Қабыш Омаровтың және Әшімбек Ыстыбаевтың аруақтарына құрмет көрсетілді, деп хабарлады Orda.kz.

Қазақстандағы Франция елшілігінің баспасөзінің мәліметінше Қазақстандағы Францияның төтенше және өкілетті елшісі Сильван Гиоге екінші дүниежүзілік соғыстың аяқталғанына 80 жыл толу мерекесімен құттықтап,  қазақстандықтарды Астанада өткен салтанатты парадтың тамаша ұйымдастырғаны үшін алғыс білдірді.

«Ең алдымен, Екінші дүниежүзілік соғыстың аяқталғанына 80 жыл толу мерекесімен қазақстандық достарымызды шын жүректен құттықтағым келеді және кеше Астанада өткен салтанатты парадтың тамаша ұйымдастырылғаны үшін алғыс білдіремін. Ерекше ризашылығымды Василенко мырза мен генерал-лейтенант Камалетдиновке білдіремін — олардың қатысуы рәсімге айрықша салтанат пен маңыз берді. 1945 жылғы 8 мамырды еске алу бізді біріктіреді, өйткені бұл күн ортақ жауға қарсы шайқастардың аяқталғанын білдіреді. Алайда бүгін біз Францияның азат етілуінің 80 жылдығын атап өтумен қатар, француз сарбаздарымен бірге біздің жерімізде шайқасқан қазақстандық партизандардың рухына ерекше құрмет көрсеткіміз келеді. Олардың артында бүкіл Франция тұр, сондықтан да Қарулы күштер министрі Себастьен Лекорню бұл іске жеке араласып, марапаттау құжаттарына қол қойды», — деді бейсенбі күні өткен рәсімде Қазақстандағы Францияның төтенше және өкілетті елшісі Сильван Гиоге.

Ол атап өткендей, Қадам Жұманиязов, Қабыш Омаров және Әшімбек Ыстыбаев деген жай ғана есімдер емес, олар — француз жерінде ерлік көрсеткен жүздеген қазақстандық жауынгердің бет-бейнесі мен тағдыры.

«Олар арқылы біз Отанынан жырақта қан төккен барлық жауынгерлерді құрметтейміз. Бүгін олардың төсіне тағылуы тиіс болған марапаттарды тапсыру құрметі бұйырғанына кеудемді мақтаныш кернеп, толқып тұрмын. Бұл жай ғана естелік болатын медальдар емес, шынайы, айырықша әскери белгілер. Осы мүмкіндікті пайдалана отырып, Қазақстанда да, Францияда да бұл жауынгерлер жайлы, кейде тіпті олардың жерленген жері жайлы мәліметтерді іздеу бойынша ауқымды жұмыс жүргізген профессор Гүлнәр Меңдіқұловаға шынайы алғысымды білдіргім келеді. Оның көпжылдық қажырлы еңбегі арқасында біз бүгін олардың рухына лайықты құрмет көрсете алдық», — деді дипломат.

Оның айтуынша, бұл марапаттар Франция мен Қазақстан арасындағы ежелгі және берік достықтың айқын белгісі болады.

«Бұл ортақ естеліктің іргетасын қалайды. Оны сақтауымыз және болашақ ұрпаққа жеткізуіміз қажет», — деді Гиоге.