Өскеменнің экс-әкімі Жақсылық Омар апелляциялық шағым түсірді

Өскеменнің бұрынғы әкімі, Шығыс Қазақстан облысы әкімінің бұрынғы бірінші орынбасары, 6 жылға бас бостандығынан айырылған Жақсылық Омар апелляциялық шағым түсірді, деп хабарлайды Orda.kz. 

Бұл ақпаратты Шығыс Қазақстан облыстық соты растады.

Еске салсақ, биылғы 18 ақпанда ШҚО әкімінің орынбасарына қатысты тергеу басталғаны туралы ақпаратты ҰҚК растады. Сот оны «алаяқтық» және «пара алу» баптары бойынша кінәлі деп тапты. Ол 6 жыл түрме жазасына кесілді. 

Адвокаттар оны түрмеге жаппай, айыппұл салумен шектелуді сұраған еді. Оған қоса, туыстарының шотында айыппұл төлеуге жететін 100 млн теңгеден астам қаражат бар екенін мәлімдеген.

Соттағы соңғы сөзінде Жақсылық Омар өз кінәсін толық мойындап, жасаған ісіне өкініш білдірді.

2018–2024 жылдары Жақсылық Омар Өскемен қаласының әкімі қызметін атқарды. 2025 жылдың сәуіріне дейін Шығыс Қазақстан облысы әкімінің кеңесшісі болды. Ал 2025 жылғы 7 сәуірден бастап ұсталғанға дейін ШҚО әкімінің бірінші орынбасары қызметін атқарды.

Оқи отырыңыз:

• Үкіметте тротуармен жүретін самокатшылардың мәселесін шешу тапсырылды
• Жапонияда жойқын жер сілкінісі: Цунами қаупі жарияланды