Жапонияда жойқын жер сілкінісі: Цунами қаупі жарияланды

Жапонияның солтүстік-шығыс жағалауында магнитудасы 7,4 болатын жер сілкінісі болды. Ықтимал цунами туралы ескерту жарияланды, деп хабарлайды Orda.kz Reuters-ке сілтеме жасап. 

Билік Иватэ, Аомори және Хоккайдо префектуралары үшін биіктігі 3 метрге дейін жетуі мүмкін цунами қаупі бар екенін хабарлады.

Жер сілкінісі Жапонияның сейсмикалық қарқындылық шкаласы бойынша «жоғарғы 5 деңгей» деп бағаланды. Бұл деңгейде адамдардың қозғалысы айтарлықтай қиындап, ғимараттарға зақым келуі, соның ішінде арматураланбаған бетон қабырғалардың құлауы мүмкін.

Нәтижесінде Жапонияның метеорологиялық қызметі 3 метрге дейін жетуі мүмкін толқындар туралы ескертті.  Кейбір жағалау аймақтарында алғашқы шағын толқындар (шамамен 40–80 см) тіркелген. Тұрғындарға теңіз жағасынан шұғыл түрде кетіп, биік жерлерге бару тапсырылған. Мыңдаған адам эвакуацияланып жатыр, өйткені цунами толқындары бірнеше рет қайталануы мүмкін. 

Кейбір аймақтарда, әсіресе Аоморида да жоғары жылдамдықтағы пойыздар уақытша тоқтатылды.  Қауіпсіздік үшін порттарда кемелер ашық теңізге шығарыла бастаған. Үкімет төтенше штаб құрып, жағдайды бақылауда ұстап отыр. 

Қазіргі уақытта қираулар мен зардап шеккендер туралы нақты ақпарат жоқ.

Оқи отырыңыз: 

• Қырғызстан президенті Шахановтың қазасына көңіл айтты
• Ақмола облысында жол апатынан үш адам қаза тапты
• Алматыда көкке шығып, серуендеуге лайық әрі таптырмас 5 орын