Үкіметте тротуармен жүретін самокатшылардың мәселесін шешу тапсырылды

Қазақстан премьер-министрі Олжас Бектенов құқықбұзушылықтардың алдын алу жөніндегі ведомствоаралық комиссия отырысында тротуармен мопедтер мен электрвелосипед мініп жүретін курьерлердің жұмысын ретке келтіруді тапсырды, деп хабарлайды Orda.kz үкіметтің баспасөз қызметіне сілтеме жасап. 

Бұл сұрақ азаматтардың самокатты қауіпті жүргізу мен жаяу жүргіншілерге төнетін қауіп туралы көптеген шағымдарына қатысты туындаған.

Талқылау барысында микромобильді көлікке қатысты жағдай қаралды. Үкімет басшысы электрвелосипедтер мен скутерлерді реттеу мәселесін қозғап, «курьерлерге шағым көп, тәртіп орнатыңыздар» деп ІІМ басшысына тапсырма берді

«Қазіргі таңда оларға мопедтерге қойылатын талаптармен бірдей талаптар қойылады. Бұл олардың қай жерде жүруіне рұқсат етілетініне, сондай-ақ жүргізуші куәлігінің міндетті болуына қатысты. Мәселе толықтай заңнамалық тұрғыда реттелген», — деп түсіндірді ІІМ басшысы. 

Отырыстың бір бөлігі интернет-алаяқтыққа арналды. Олжас Бектенов қарсы іс-қимыл шараларын күшейту қажеттігін атап өтті.

«Киберқылмыскерлер көбінесе заманауи цифрлық технологияларды тез пайдаланады. Интернет-алаяқтыққа қарсы неғұрлым тиімді шаралар қажет. ІІМ-ге мүдделі мемлекеттік органдармен бірлесіп, алаяқтық транзакцияларды бұғаттау тетіктері, сондай-ақ жалған колл-орталықтарды анықтау үшін мемлекеттік органдар мен банктер арасында деректер алмасу бойынша қосымша ұсыныстар енгізуді тапсырамын. «Цифрлық полицей» жобасын енгізуді жеделдетіп, киберволонтерлік тәжірибені кеңейтіп, кадрлар даярлауды күшейту қажет», — деді ол. 

Сондай-ақ Еуропа Кеңесінің компьютерлік қылмыстар туралы конвенциясын ратификациялау туралы заң жобасын келісу жұмысын қысқа мерзімде аяқтау тапсырылды.

Сонымен Қазақстан ІІМ электрвелосипедтерді мопедтерге теңестіреді. Оларға жүргізуші куәлігінің болуы және жүруге рұқсат етілген орындарды сақтау (тротуармен жүруге тыйым салу) талаптары қойылады.

Еске салсақ,  2026 жылғы 1 шілдеден бастап Қазақстанда самокат жүргізушілерін көлікті тіркеуге, жүргізуші куәлігін алуға және жолдың жүру бөлігінде қозғалуына міндеттейтін қатаң ережелер күшіне енеді.

Жиында мопед жүргізушілеріне қойылатын талаптар күшейтілгеннен кейін, Алматыда курьерлер тіркеу мен айыппұлдан жалтару үшін жаппай электрвелосипедке ауысып, тротуарларды пайдалануды жалғастырып жатқаны айтылды.

Бектенов курьерлердің қатысуымен болатын жол-көлік оқиғаларының жоғары деңгейіне де назар аударуды тапсырды.

Оқи отырыңыз: 

• Самокат мінетіндерге қатысты нақты шаралар қабылданады
• Жазда самокатпен жүру тәртібі өзгеріп, қатаң талаптар енгізіледі
• Алматыда электросамокат мінген жасөспірімдер бала отырған арбаны қағып кетті
• Алматыда самокат мінген екі қызды автобус қағып кетті