Өмір бойына бас бостандығынан айырылған Аймахан Шерханның адвокаттары апелляциялық шағым түсірді

Қаза болған Нұрай Серікбайдың отбасының адвокаты Аянхан Омаров сотталушы тараптың апелляциялық шағымын зерделегеннен кейін оған қарсылық дайындайтынын мәлімдеді, деп хабарлайды Orda.kz.

Өмір бойына бас бостандығынан айырылған Аймахан Шерханның қорғаушылары апелляциялық шағым бергенін жәбірленуші тараптың адвокаты әлеуметтік желідегі  парақшасында хабарлады.

«Шағымды зерделеп, оған қарсылық дайындаймын. Жақын арада іс апелляциялық сатыдағы сотта қаралады» деп жазды Аянхан Омаров

Шерхан Аймаханға өмір бойына бас бостандығынан айыру жазасы тағайындалды
21 жастағы Нұрай Серікбайдың өліміне қатысты  қылмыстық іс бойынша үкімді Шымкент қаласының қылмыстық істер жөніндегі мамандандырылған ауданаралық соты 2026 жылғы 13 тамызда шығарған.

Сот Шерхан Аймаханды некеге тұруға мәжбүрлеу, аңду және аса қатыгездікпен адам өлтіру қылмыстары бойынша кінәлі деп танып, өмір бойына бас бостандығынан айыру жазасын тағайындады.

Сонымен қатар сот сотталған азаматты жәбірленуші тарапқа моральдық зиянның өтемақысы ретінде 25 миллион теңге және материалдық шығын ретінде 5 миллион теңге төлеуге міндеттеді.

Нұрай Серікбай 2026 жылғы қаңтарда Шымкент қаласында бірнеше жерінен пышақ жарақатын алып, қаза болған. Күдікті бірнеше күннен кейін қаладан шамамен 10 шақырым жерде ұсталды.

Оқиға қоғамда үлкен резонанс туғызғаннан кейін президент Қасым-Жомарт Тоқаев Шымкент полициясының осы іс бойынша әрекетіне тексеру жүргізуді тапсырды.

Кейін қалалық полиция департаментінің басшысы мен оның бірінші орынбасары қызметінен босатылды. Ал полиция қызметкерлеріне қатысты қызметтік салғырттық фактісі бойынша тергеу басталды.

2026 жылғы ақпанда тергеу барысында тағылған айып қайта сараланып, іс аса қатыгездікпен адам өлтіру бабы бойынша тергелетін болды. 30 сәуірде жүргізілген сараптама Шерхан Аймаханның  ақыл-есі дұрыс екенін көрсетті.

Іс жазда сотқа жетті. Нұрайдың отбасы сотталушыға тағылған барлық үш бап бойынша айыпты сақтауды және оған өмір бойына бас бостандығынан айыру жазасын тағайындауды сұраған.

Сот отырысы кезінде Шерхан Аймахан өз кінәсін мойындамады. Ол қайғылы оқиға болған күні Нұрай өзіне бірінші болып пышақ жұмсағанын мәлімдеді. Сотталушының айтуынша, одан кейінгі оқиғаларды ол аффект жағдайына байланысты есіне түсіре алмаған.

Алайда сот судьясы бұл нұсқа мен сотталушының тергеу барысында берген жауаптарының арасында қарама-қайшылық бар екеніне назар аударды.

Енді қорғау тарабының апелляциялық шағымы апелляциялық сотта қаралады. Сот отырысының қорытындысы бойынша алғашқы үкімнің күшінде қалатыны немесе оған өзгерістер енгізілетіні анықталады.

Оқи отырыңыз:

• Нұрай Серікбайдың өлімі бойынша сот үкімі шықты: Өмір бойына бас бостандығынан айыру жазасы берілді
• Нұрай Серікбайдың өлімі: Сараптама айыпталушыны есі дұрыс деп таныды
• «Әке, мені алып кетші»: Нұрай Серікбайдың әкесі сотта қызының соңғы сөзін айтты
• Нұрай Серікбайдың өлімі: Прокурор күдіктіге өмір бойына бас бостандығынан айыру жазасын сұрады