«Әке, мені алып кетші»: Нұрай Серікбайдың әкесі сотта қызының соңғы сөзін айтты

21 жастағы Нұрай Серікбайдың ата-анасы оның өліміне қатысты сотта куәлік берді. Жалғыз қызынан айырылған әке мен ана көз жастарын тия алмады, деп хабарлайды Orda.kz OTYRAR-ға сілтеме жасап.

Марқұмның әкесі Бауыржан Сағымбек қызының қаза болған күні болған соңғы әңгімесін еске алды.

«Мен қызыммен телефон арқылы сөйлестім. Ол маған: «Әке, мұнда мен қаламайтын жағдай болып жатыр. Мені алып кетші», – деді. Кешкі жетілер шамасында жұбайым хабарласып, «Нұрайға бірдеңе болды. Ол жерде жатыр, полиция мені жолатпай жатыр» деді. Сол сәтте бір сұмдықтың болғанын түсіндім, басшылыққа хабарлап, дереу жолға шықтым», – деді Бауыржан Сағымбек. 

Әкесінің айтуынша, Нұрай мектепті үздік бітіріп, жоғары оқу орнына мемлекеттік грантпен түскен. Оның болашаққа жоспары көп болған. Ашық мінезді, мейірімді, өмірсүйгіш қыз тұрмысқа шығуға асықпаған.

Ол маңызды шешімдердің барлығын ата-анасымен ақылдасқанымен, соңғы таңдауды өзі жасайтын болған. Қызды ұрлап, тұрмыс құруға мәжбүрлеген кезде де ата-анасы алдымен оның пікірін сұраған. Нұрай келіспеген соң, оны бірден үйіне алып кеткен.

Дегенмен сотталушы кінәсін толық мойындамады.

Алдыңғы күні Шымкент қаласының мамандандырылған ауданаралық қылмыстық сотында айыпталушы Шерхан Аймахан да жауап берді. Ол өз кінәсін толық мойындамай, қылмысты аффект күйінде жасағанын айтады.

Іс бойынша алдын ала тыңдау 23 шілдеде өткен. Айыптау актісіне сәйкес, Аймахан Нұрайды өз еркінен тыс алып кетіп, кейін оны аңдыған. Біраз уақыттан соң ол қызға пышақпен 35 рет соққы жасап, оқиға орнынан қашып кеткен.

Қазіргі уақытта 28 жастағы айыпталушыға үш бап бойынша айып тағылып отыр: ерекше қатыгездікпен кісі өлтіру, аңду (сталкинг) және некеге мәжбүрлеу. Марқұмның отбасы оған өмір бойына бас бостандығынан айыру жазасын талап етіп отыр.

Бұған дейін іс прокуратураға жолданған кезде марқұмның отбасы тергеу нәтижелерімен келіспейтінін мәлімдеген болатын. Жәбірленуші тараптың адвокаты Аянхан Омаров тергеу барысында бірқатар өтініштер қаралмағанын және іс материалдарында елеулі заңбұзушылықтар бар екенін айтқан. Осыған байланысты отбасы Бас прокуратураға жүгініп, істі ерекше бақылауға алуды сұрады.

Бұл жағдайға Қазақстан президенті де пікір білдіріп, полиция қызметкерлерінің әрекетіне тиісті баға беру қажеттігін айтып, дұрыс жұмыс істеуді тапсырған болатын.

Оқи отырыңыз:

• Нұрай Серікбай ісі: ІІМ күдіктінің туыстарының қатысын тексеріп жатыр
• Полиция растады: «Нұрай Серікбайды өлтірді деген күдікті психикалық емдеу мекемесінде жатыр»
• Шымкентте Нұрайдың өлімі бойынша іс прокуратураға өтті, отбасы тергеу қорытындысымен келіспейді