Олжас Бектенов қазақтың аңыз ұшқышы - Талғат Бигелдиновтің рухына тағзым етті

Премьер-Министр Олжас Бектенов Кеңес Одағының екі мәрте батыры, аты аңызға айналған шабуылшы ұшқыш Талғат Бегелдиновтің ескерткішіне гүл шоқтарын қойды, деп хабарлайды Orda.kz.

Салтанатты шара жеңістің 80 жылдығына орай өтті. Оған қатысушылар қаза болғандарды бір минут үнсіздікпен еске алды.

Соғыс кезінде Талғат Бигелдинов 305 жауынгерлік ұшу жасап, 500 сағаттан астам уақыт әуеде болып, дұшпанның ең мықты жеті ұшағын атып түсірді. 

Соғыстан кейін ол Қазақстанның азаматтық авиациясын дамыту мен мамандар даярлауда аянбай еңбек етті.

Бұған дейін президент қазақстандықтарды жеңіс күнімен құттықтаған болатын. Халыққа үндеуінде ол жеңістің 80 жылдығының ерекше маңыздылығын, майдангерлердің ерлігі мен тыл еңбеккерлерінің жанқиярлығын ерекше атап өтті. 

Тоқаев жеңістің қандай бағамен келгенін еске салып, бейбітшілік пен келісімді сақтауға шақырды.

Мерейтойлық датаға орай бүкіл ел бойынша естелік іс-шаралар өтіп жатыр, соғыс батырларының құрметіне 500-ге жуық көше атауы өзгереді. Астанада әскери парад өтті. Президент азаматтарға денсаулық, бақыт және бейбітшілік тіледі.

Мәскеудегі жеңіс парадына қай мемлекеттердің басшылары қатысады және қай ел жетекшілері не себепті Мәскеуге бармайтыны туралы баяндадық. Алматыда «Батырларға тағзым»  шеруі өтті.

Orda.kz екінші дүниежүзілік соғыста Кеңес одағы ажал аузына тастаған қазақтың атты әскері  туралы зерттеу мақаласын жариялады.

Соғыс кезінде шекараның арғы бетінде қалған Қытайдағы қазақтар да азаттыққа жетуге ұмтылды. Саяси күштер, соның ішінде өз мүддесін ойлаған Кеңес үкіметі де оларды астыртын қолдап, тыңшыларын жіберді. Сондай құпиялардың бірі — Баймұқат Тілеубаевтың Қытай еліне тыңшы болып барғаны туралы да оқи отырыңыздар. 

Астанада 7 мамырда жеңістің 80 жылдығына арналған әскери шеруде кеудесі медальға толы қарт адам қоршаудың сыртында қалып, жұртшылық бұл оқиғаға назар аударды.