Мамин басқарған үкімет не бітіріп жатыр? Желіге шолу

Қазақстанда құрылыс материалдары, азық-түлік бағалары қымбаттаған тұста Мамин басқарған үкіметке артылатын сын көбейіп кетті. Үкімет құрамын ауыстыру туралы ұсыныстар да бар.

Orda.kz желіге шолу жасап көрді.

Үкіметтің 5 «жетістігі»

Саясаттанушы Санжар Боқаев Мамин премьер-министр қызметіне тағайындалған 2019 жылдан бері Қазақстан экономикасының кері кетіп бара жатқанын айтады.

 –  Мамин парламент палатасының отырысында «экономикалық өсім» бар деген айтты. Өнеркәсіп өндірісінің индексі құлады. ЖІӨ құлады. Жұмыссыздық көбейді. Тиімсіз жаратылған бюджет құны 570 млрд теңге. Мемлекеттік қарыз көбейді. Мен тек үкімет құлдырауының бес-ақ түрін айттым.

Үндемейтін және керең үкімет

Қоғам белсендісі, заңгер Айгүл Орынбек те facebook парақшасында жанармайдың жоқтығын айтып жазба қалдырды.

–   Бұл Үкімет халықты көшеге шығару үшін жұмыс істеп отыр!Былтыр ауру өршіп тұрғанда дәріні тығып отырды біразы өліп тынды. Шекараның бәрін жауып, Халықтың еккен қырыққабатын ысырап қылды оған да үндемедік! «Ойбай, кризис, бюджетте ақша жоқ» дейді, бірақ әкімдер наурыз тойын, қала күнін миллиондар шашып тойлағанда бұл үкімет үндемейді!

Тек қара халық отыз адамға той жасаса айыппұл салып, кәсібін тоқтатады. Ал бүкіл әншілерді жинап алып Түркістан облысының әкімі Шүкеев пен Шымкент қаласының әкімі Әйтенов қала күндерін тойлап сауық-сайран құрып жүргенде бұл үкімет үндемейді!

Сәләркі болмаса қауын қарбызды сыртқа шығарып сата алмаймыз ғой, уа көзі соқыр, құлағы керең үкімет!- делінген жазбада.

«Қазақстан үй салудан ТМД-да бірінші орында»

Журналист Нұргелді Әбдіғани «Үй көп», дейді Мәмин. «Үйсіз көп», деймін мен...» деген тақырыпта жазба қалдырды. Жазба:

–  Мәмин деген біздің үкіметтің «бездарный» басшысы (субьективті пікірім) Парламентте 3 сағатқа жуық есеп қылыпты. Сөйтіп: «Қазақстан үй салудан ТМД-да нөмірі бірінші орында», - деп жарияға жар салыпты. Ал сол Мәминнен: «Қазақстанда үйсіз-күйсіз жүрген адамның саны неше?», - деп сұраған жұрт болды ма екен?..

Осыншама омақаса құлаған Мәминнен ел енді не күтеді? Өзінің «бездарныйлығын» мойындап, командасын жинап: «Уа, халқым, қолымыздан түк келмеді», - деп доғарысқа кетуін күтеді. Ал Мәмин қайтеді? Кетуге мәжбүр болып, өзінің тікелей басшылары (әдейіге көпше түрде жазып отырмын) «кете ғой» демейінше, «отыр көтім он айға» салып отырады. Ал кетуге тура келгенде, кетераяққа: «Елбасым мен Президентіме тізем қанағанша тізерлеп тұрып алғыс айтамын», - деп кетеді.

Үкіметтің ойынша бәрі керемет

Қоғам белсендісі Мұхтар Тайжан үкімет отырысының «нәтижесіз» екенін жазған.

 –  Бүгінгі Парламентте өткен Үкіметтің 3-сағатқа созылған есебін көріп шықтым. Не деуге болады? Әзірше экономика жағынан түбегейлі өзгерістерді күту - бос әуре. Әзірше баяғы жартас сол жартас жалғаса береді. Үкіметтің ойынша бәрі керемет, бәрі дұрыс, яғни ешқандай реформаны күтпеңдер деп отыр. Бірақ нағыз реформаны жүзеге асырмаса халықтың жағдайы түзелмейді. Олигарх өз мүдделерін әлі де қатаң ұстап тұр. Әзірше солай.

Еске салар болсақ, Мұхтар Тайжан үкіметті отставкаға жіберіп, «жаңа үкімет» құруды ұсынған болатын.