Қайрат Қожамжаровтың тобы: Бұрынғы арнайы прокурор Олеся Кексель ұсталды

Бұрынғы арнайы прокурор Олеся Кексельдің үйқамаққа алынғаны туралы ақпарат тарады.

Orda.kz дереккөздері Бас прокуратура жанындағы Арнайы прокурорлар қызметінің бұрынғы басшысы Олеся Кексель де ұсталып, үйқамаққа алынғаны туралы хабарлады.

Олеся Кексель кім?

Олеся Кексель – бұрынғы арнайы прокурор, Қайрат Қожамжаровтың сенімді серіктерінің бірі саналған. Ол экс-премьер Серік Ахметов пен экс-министр Қуандық Бишімбаевқа қатысты атышулы істерді тергеген.

2018 жылы Бас прокуратура жанындағы арнайы прокурорлар қызметін басқарды. Бұған дейін Сыбайлас жемқорлыққа қарсы ұлттық бюроның тергеу департаменті басшысының орынбасары қызметін атқарған.

2019 жылы кәсіпкер Нәбиевтің шағымы негізінде Кексель мен әріптесі Бауржан Габбасовқа қатысты «азаптау» бабы бойынша іс қозғалғаны белгілі болды. Кексель тергеу барысында «қорғану құқығы бар куә» ретінде жауап берген.

Сол жылы Кексельдің Германияға кетіп қалғаны туралы ақпарат тарады.

Кексельдің аты жуырда ұсталған Антикордың бұрынғы басшысы Талғат Татубаевпен жиі қатар аталады. Екеуі де — бқрынғы Бас прокурор Қайрат Қожамжаровтың командасының өкілдері.

Татубаев азаптау ісі бойынша ұсталған болатын. Бас прокуратура оның Қылмыстық кодекстің 146-бабы бойынша күдікке ілінгенін растады. Оған бұрынғы қызметінде тергеу жүргізу барысында азаптау қолданды деген айып тағылған.

Қазіргі уақытта Олеся Кексельге нақты қандай іс қозғалғаны және оның үйқамаққа алынғаны ресми түрде расталмады.