Астанадағы LRT: Мәжіліс депутаттары жаңа пойыздарды сынап көрді

Астанада LRT жобасына жауапты компания мәжіліс депутаттарына пойыздардың ішкі жай-күйін көрсетіп, жүйенің қалай жұмыс істейтіні жөнінде таныстырылым өткізді, деп хабарлайды Orda.kz.

Депутат Самат Нұртаза өзінің Facebook парақшасында жазғандай, кездесуге Мәжіліс депутаттары Дүйсенбай Тұрғанов, Павел Казанцев, Марат Башимов, Татьяна Савельева және Снежана Имашева қатысқан. LRT әкімшілігі оларды нысандағы қазіргі жағдаймен таныстырып, экскурсия өткізген.

Астана LRT ұсынған негізгі деректер мыналар:

• Жобаның жалпы құны – 1,8 млрд АҚШ доллары.
• Әуежай мен Нұрлы жол вокзалы арасында 18 станция болады.
• Станциялар арасындағы арақашықтық – 400 метрден 2 шақырымға дейін.
• Барлық станцияларда эскалаторлар мен лифтілер қарастырылған.
• Әр пойыз төрт вагоннан тұрады, вагондар арасында қабырға болмайды.
• Барлығы 19 құрам жолға шығады.
• Қозғалыс аралығы – 2–4 минут.
• Пойыздар сағат 06:00 мен 23:00 аралығында жүреді.
• Билет бағасы шамамен 200 теңге болуы мүмкін, бірақ бұл шешім әлі бекітілмеген.
• Болашақта LRT тармақтарын Қосшы және Ільинка бағыттарына дейін ұзарту жоспарлануда.

Самат Нұртаза пойыздардың сапасына жеке тоқталып, былай деді:

«Сапасы жаман емес, жұмсақ пластик. Лондон мен Мәскеудегі вагондардағыдай қатты емес – орындықтар жұмсақ матамен қапталған. Тек кейін бүлінбесе дейсің – біреудің аты-жөндерімен шимайланып кетпесе болғаны», – деп жазды ол.

Депутат сонымен қатар жобада жұмыс істеп жатқан қытайлық мамандардың кәсібилігін атап өтті. Оның айтуынша, олар пойыз жүйесінің ауа райының түрлі жағдайларындағы беріктігін тексеріп жатыр.

«Қыста есіктер қатпай ма? Жазда рельстер кеңейіп кетпей ме? Апат жағдайында пластик сынбай ма? Барлық сынақтар аяқталған соң, қытайлық серіктестер LRT жүйесіне кепілдік береді», – деді Нұртаза.

Жаңа пойыздардың ішкі және сыртқы көрінісі қазақы ою-өрнектермен безендірілген. Жоба авторлары жылы әрі көзге жайлы түстерді арнайы таңдаған. Ал тіректер жарнама орналастыру үшін жалға беріліп, ол қаржы жолды күтіп ұстауға жұмсалмақ.

Пойыздарды жуу және тазалау үшін жеке депо салынып, онда барлық жұмыс роботтар арқылы жүргізіледі. Тазалау әр түн сайын жүргізіледі деп жоспарланған.

Әр құрамда машинист болмаса да, қауіпсіздік пен тәртіпке жауап беретін бір бақылаушы қызмет етеді.

Алайда LRT вагондары іске қосылмай жатып вандализмге ұшыраған: қызметкерлер олардың сыртын бояп кеткен жазулардан тазартып үлгерген.