Режиссер Сламбек Тәуекел дүниеден озды

Белгілі кинорежиссер, сценарист және Қазақстанның еңбек сіңірген қайраткері Сламбек Тәуекел дүниеден озды, деп хабарлайды Orda.kz.

Мәдениет және ақпарат министрлігі марқұмның отбасына, туған-туыстарына және әріптестеріне қайғыра көңіл айтты.

«Сламбек Тілеуқабылұлы – қазақ киноөнерінің дамуына елеулі үлес қосқан көрнекті тұлға. Тарихи-көркем фильмдердің бірқатарын дүниеге әкелген кәсіби режиссер, білікті сценарист әрі продюсер ретінде ұлттық руханияттың өркендеуіне еңбек сіңірді», – деп хабарлады министрлік.

Сламбек Тәуекел «Құрмет» және «Құрмет белгісі» ордендерінің иегері, бірқатар танымал тарихи фильмдердің авторы. Ол Қазақ ұлттық өнер университетінде ұзақ жылдар бойы ұстаздық етіп, өнер саласындағы жас мамандардың қалыптасуына үлкен үлес қосты.

Оның шығармашылығы мен қоғамдық қызметі ұлттық кино тарихында айрықша орын алады. Министрлік Сламбек Тәуекелдің «ғибратты ғұмыры халқының жадында мәңгілік сақталатынын» атап өтті.

Марқұмның жерлеу рәсімі мен нақты уақыты жайлы ақпарат кейінірек хабарланады.