Коронавируспен кім жиі ауыратыны анықталды

Аурудың таралуы бойынша «қызыл аймаққа» кіретін Алматыда коронавируспен кім жиі ауыратыны белгілі болды, деп хабарлады ORDA Liter.kz-ке сілтеме жасап.

Мегаполис әкімдігінің Telegram-каналының хабарлауынша, коронавирустық инфекцияның 35%-ын 20-39 жас аралығындағы азаматтар құрайды. Ал 40-59 жастағылар аурудың 27,4%-ын, 60 жастан асқандар 21%-ын құрады.

Сонымен қатар, әкімдік инфекция көздері туралы ақпарат берді:

• 39,6% - қоғамдық орындарға бару;
• 27,5% - отбасында коронавирус инфекциясы бар науқаспен байланысу;
• 20,3% - көлік.

«Отбасылық іс-шараларда инфекциялар көбейеді», - делінген хабарламада.

Қазіргі уақытта оңтүстік астанадағы ауруханаларда 909 науқас емделуде. Олардың 149-ы ауыр, 745-і орташа ауырлықта, ал 15 науқастың жағдайы өте ауыр.

Коронавируспен 596 науқас үйде емделіп жатыр.

Қазақстанда соңғы тәулікте 1266 адам коронавирусты жұқтырды.

25 қаңтарда Алматы «қызыл аймаққа» кірді, Нұр-Сұлтан, Ақмола, Атырау, Батыс Қазақстан, Қостанай, Павлодар және Солтүстік Қазақстан облыстары да қызыл аймақта.

Республикада коронавирустық инфекцияға қарсы жаппай вакцинация 1 ақпанда басталады. Президент Қасым-Жомарт Тоқаев 26 қаңтарда өткен Үкіметтің кеңейтілген отырысында қазақстандық вакцинамен екпе алатынын мәлімдеді.