Қазақмыс кенішінде жұмысшы қаза тапты

«Қазақмыс» компаниялар тобы ағымдағы жылдың 26 ​​желтоқсанында Ұлытау өңірінде орналасқан Жыланды кенішінде болған апат туралы хабарлады.

Компанияның баспасөз қызметінің хабарлауынша, сағат 18:30-да Шығыс Сары-Оба кеніші учаскелерінің бірінде  өздігінен жүретін жерасты көлігінің жүргізушісі 31 жастағы шахта жұмысшысын қағып кеткен.

«Өздігінен жүретін жерасты көлігін жұмыс орнына алып бара жатқанда жүргізуші абайсызда 31 жастағы жұмысшыны қағып кеткен. Нәтижесінде қызметкер ауыр дене жарақаттарын алған. Апаттың мән-жайы мен себептерін арнайы комиссия анықтап жатыр» делінген хабарламада.

«Қазақмыс» компаниясы басшылығы мен еңбек ұжымы марқұмның отбасы мен жақындарына көңіл айтты.

Қараша айында Қазақмыс кәсіпорындарында төрт адам қаза тапты. 6 қарашада Шығыс Қазақстан шахтасында кеншінің, ал 22 қарашада өңдеу зауытында конвейер жұмысшысының қаза тапқаны белгілі болды. Қарашаның 27-сі күні Жайсаң кенішінде тау-кен жұмыстарын жүргізу кезінде екі жұмысшы қаза тапты.