«Орыс мафиясының» ақшасына қазақстандықтың қатысы бар ма?

Испанияның ұлттық полициясы «орыс мафиясының» ақшасын жымқырды деген күдікпен 23 адамды ұстады. Олардың арасында Қазақстан азаматы бар дейді.

БАҚ-та жарияланған ақпараттарға сенсек, ұсталғандардың көбі испандықтар, алайда олардың ішінде 8 Ресей, 2 украин, 1 Қазақстан, 1 Алжир азаматы бар екен.

Полиция бұл «ұсталғандардың жоғары иерархиялық деңгейіне байланысты» соңғы он жылдағы «Еуропаның шығысындағы мафияға» қарсы ең үлкен операция» екенін мәлімдеді.

Тергеушілердің мәліметінше, аталған топ мүшелері сыбайлас жемқорлықпен және «мемлекеттік институттарға енгізумен» айналысқан.

«Ұйым Испания экономикасының негізгі салаларын бақылауды және мемлекеттік мекемелерге заңгерлердің, шенеуніктердің, саясаткерлердің, кәсіпкерлердің және компьютерлік хакерлердің көмегімен кіруді жоспарлаған», - делінген Ұлттық полиция хабарламасында.

2013 жылы полиция «орыс мафиясы Испаниядағы белсенділігін арттырып, оны бұрынғы Кеңес Одағы елдеріндегі қылмыстық ұйымдардың ақшасын жылыстатудың бастапқы нүктесі ретінде пайдаланып, бүкіл әлемдегі қылмыстық әрекеттерден алынған ақшаны бизнеске инвестициялағанын» анықтаған кезден тергеу  басталған болатын.

Құқық қорғау органдары Приморьенің бұрынғы вице-губернаторына қатысты ақша жымқыру бойынша іс қозғады.

Топ жетекшілері күмәнді банктік операцияларды жүргізіп, жалған компаниялар мен жалған тұлғаларды пайдаланып, Испанияға қолма-қол ақша әкелген.

Аликанте, Мадрид, Таррагона және Ибицада жүргізілген тінту кезінде қару-жарақ тәркіленіп, 300 мың еуро қолма-қол ақша, 16 автомобиль, гауһар тастар, криптовалюта табылған. 

Тергеу амалдарының шарты бойынша миллиондаған еуроға тең банктік шоттар мен активтерге тыйым салынды.