Иран АҚШ-тың Ормуз бұғазына кіруіне тыйым салды

Иран АҚШ-тың Парсы және Оман шығанақтарына, сондай-ақ Ормуз бұғазына кіруіне тыйым салды. Иран армиясының қолбасшысы, генерал Амир Хатами Вашингтонның аймақтан «қуылғанын» мәлімдеді, деп хабарлайды Orda.kz Иранның Mehr агенттігіне сілтеп.     

Ол АҚШ президенті Дональд Трамптың бұғазды Америка аумағы деп жариялау қаупіне қатысты айтып отыр.

АҚШ-қа бұдан былай Парсы шығанағына, Оман шығанағына және Ормуз бұғазына кіруге рұқсат етілмейді. Бұл туралы Иран армиясының қолбасшысы генерал Амир Хатами мәлімдеді.

«Америкалық әскери базалар ешқандай жағдайда бұрынғы қалпына келе алмайды. Иран Ислам Республикасына қауіп төндіру мақсатында көршілес аумақта нысандардың құрылуына ешқашан жол бермейді. Жалғыз жол бар, ол америкалықтардың аймақтан кетуі. Олар іс жүзінде қуылды және бұдан былай Парсы шығанағына, Оман шығанағына және Ормуз бұғазына кіре алмайды», – деді Хатами. 

Иран қолбасшысы Тегеран бұл бағытта «жеңіске жеткенін» және енді осы жеңісті «бекітіп жатқанын» атап өтті.

Хатами АҚШ президенті Дональд Трампты «сәтсіздікке ұшыраған саясаткер» деп атап, оның «таяздықпен» АҚШ Ирандағы мақсаттарына қол жеткізе алады деп ойлағанын айтты.

«Олар осы шаралар арқылы «Иран мәселесін» шеше аламыз деп ойлады әрі оны мәлімдеді. Иранда проблема жоқ, бұл ядролық бағдарламаны сылтау ету. Ойдан шығарылған бұл мәселенің әскери жолмен шешімі жоқ», – деді ол.

Генералдың айтуынша, АҚШ «бұрынғыдай билік пен ықпалға ие емес».

Қазіргі уақытта Ормуз бұғазындағы кеме қатынасы шектелген. 11 тамызда Тегеран Вашингтонға делдалдар арқылы теңіз жолын қайта ашу шарттарын жеткізген. Олардың арасында қауіп-қатер мен соғысты тоқтату, қоршау мен санкцияларды алып тастау, келтірілген шығынды өтеу және бұғатталған активтерді босату талаптары бар.

Ал АҚШ президенті Дональд Трамп 14 тамызда Тегеранмен соғыс аяқталғаннан кейін  Ормуз бұғазын Америка аумағы деп жариялайтынын мәлімдеді.

Ол сондай-ақ бұғаз маңындағы жағдайдың қарапайым америкалықтарға әсер етіп жатқанын мойындады. Алайда Трамп бұл мәселеге байланысты «кешірім сұрамайтынын» айтты.

Ормуз бұғазы – әлемдік энергетика үшін аса маңызды теңіз жолдарының бірі. Парсы шығанағынан мұнай мен газ тасымалдайтын негізгі теңіз бағыттарының бірі саналатын бұл бұғаздың жабылуы немесе кеме қатынасының шектелуі әлемдік мұнай нарығына және энергия бағасына айтарлықтай ықпал етуі мүмкін.

Оқи отырыңыз:

• Иран Трамптың Ормуз бұғазын АҚШ-тікі деп жариялау жоспарына жауап берді
• Иран мен Оман Ормуз бұғазы арқылы өтетін кемелерді бақылау туралы келісімге келді
• Жаһандық экологияға қауіп: Оман мен Иран жағалауындағы мұнай төгінділері