16 жастағы қыз қаза тапты: Алматы облысында бір топ жасөспірім жол апатына түсті

17 тамыз 2026 15:16 Жәукен Әсем

Фото: Бейнежазбадан кадр

Алматы облысының Райымбек ауданында кәмелетке толмағандар отырған көлік аударылып, 16 жастағы қыз қаза тапты, деп хабарлайды Orda.kz.

Жол-көлік оқиғасы 17 тамызда сағат 04:20 шамасында «Сарыжаз–Қарасаз» автожолының 5-шақырымында Сарыжаз ауылынан шамамен 12 шақырым жерде болған.

View this post on Instagram

Orda.kz дереккөзі бойынша, 16 жастағы жасөспірім Toyota Alphard көлігін шығыс бағытта жүргізіп келе жатып, тізгінге ие бола алмай, көліктің аударылуына жол берген. Апат салдарынан көліктегі 16 жастағы жолаушы қыз алған жарақатынан оқиға орнында қаза тапты. Оның денесі мәйітханаға жеткізіліп, сот-медициналық сараптама тағайындалды.

Көлік жүргізушісі мен тағы төрт жолаушы түрлі дене жарақаттарымен Нарынқол ауылындағы Райымбек аудандық ауруханасына жеткізілді. Зардап шеккендердің барлығы кәмелетке толмағандар. Көлікте барлығы алты жасөспірім болған. Зардап шеккендердің денсаулық жағдайы мен алған жарақаттары анықталып жатыр.

Orda.kz дереккөзінің хабарлауынша, бұл дерек Қылмыстық кодекстің 345-бабы 3-бөлігі бойынша сотқа дейінгі тергеп-тексерудің бірыңғай тізіліміне тіркелген.

Алматы облысы полиция департаментінің мәліметінше, Сарыжаз – Қарасаз автожолының 5-шақырымында болған жол-көлік оқиғасы бойынша полиция қызметкерлері сотқа дейінгі тергеуді бастады.

Алдын ала мәлімет бойынша, кәмелетке толмаған жүргізуші көлікті басқара алмай, оның аударылып кетуіне жол берген. Жол апаты салдарынан жүргізуші мен төрт жолаушы медициналық мекемеге жеткізілді. Жолаушылардың бірі алған жарақаттарынан оқиға орнында көз жұмды. Қазіргі уақытта оқиғаның барлық мән-жайын, соның ішінде кәмелетке толмаған адамның көлік тізгініне қалай отырғанын, сондай-ақ оған әсер еткен себептер мен жағдайларды анықтауға бағытталған қажетті тергеу шаралары жүргізіліп жатыр.

Тергеу нәтижесі бойынша заңнамаға сәйкес процестік шешім қабылданады.

Оқи отырыңыз:

Жаңалықтар

барлық жаңалықтар