16 жастағы қыз қаза тапты: Алматы облысында бір топ жасөспірім жол апатына түсті

Алматы облысының Райымбек ауданында кәмелетке толмағандар отырған көлік аударылып, 16 жастағы қыз қаза тапты, деп хабарлайды Orda.kz.

Жол-көлік оқиғасы 17 тамызда сағат 04:20 шамасында «Сарыжаз–Қарасаз» автожолының 5-шақырымында Сарыжаз ауылынан шамамен 12 шақырым жерде болған.

Orda.kz дереккөзі бойынша, 16 жастағы жасөспірім Toyota Alphard көлігін шығыс бағытта жүргізіп келе жатып, тізгінге ие бола алмай, көліктің аударылуына жол берген. Апат салдарынан көліктегі 16 жастағы жолаушы қыз алған жарақатынан оқиға орнында қаза тапты. Оның денесі мәйітханаға жеткізіліп, сот-медициналық сараптама тағайындалды.

Көлік жүргізушісі мен тағы төрт жолаушы түрлі дене жарақаттарымен Нарынқол ауылындағы Райымбек аудандық ауруханасына жеткізілді. Зардап шеккендердің барлығы кәмелетке толмағандар. Көлікте барлығы алты жасөспірім болған. Зардап шеккендердің денсаулық жағдайы мен алған жарақаттары анықталып жатыр.

Orda.kz дереккөзінің хабарлауынша, бұл дерек Қылмыстық кодекстің 345-бабы 3-бөлігі бойынша сотқа дейінгі тергеп-тексерудің бірыңғай тізіліміне тіркелген.

Редакция Алматы облысы полиция департаментіне сауал жолдады.

Оқи отырыңыз:

• 16 жастағы қыз қаза тапты: Алматы облысында бір топ жасөспірім жол апатына түсті
• «Бұл арандату емес»: Бақытжан Базарбектің туыстары жол апаты туралы пікір білдірді