Жаңатоған ауылының тұрғындары өртпен өздері күресіп жатыр: Бір адам ауыр жараланды

Қарағанды облысы Қарқаралы ауданындағы Жаңатоған (Бейбітшілік) ауылы маңындағы өрт тұрғындарды алаңдатып отыр. Бірнеше адамның шөбі мен қыстағы өртеніп, өрт сөндіруге шыққан ауыл тұрғыны ауыр жараланған деп хабарлайды Orda.kz. 

Бұл туралы ауыл тұрғыны Керім Аянқызы Threads желісінде ауылдағы жағдайды айтып, қажетті техниканың жоқтығына алаңдаушылық білдірді.

«Біздің ауылға көмек керек, ауылда өрт өршіп тұр. Қажетті дұрыс техника жоқ. Қарағанды облысы Қарқаралы ауданы Жаңатоған (Бейбітшілік) ауылында қанша адамның шөбі, қыстағы өртенді. Әрқайсымыздың әкеміз, туғандарымыз ауыл адамдары осы өртте жүр. Ауыл ішіне жақындап қалыпты. Сыныптасымыздың әкесін 50% күйік шалып, ауруханаға алып кетіпті. Жалғыз ауыл адамдарының күші жетпейді. Жанымыз қалмады алаңдап. Неге ауданда дұрыс техника жоқ? Қашан қамтылады? Жылда осы ғой. Қанша адамның еңбегі, жинаған шөптері жанып кетті. Өрт Шет ауданында бірнеше күн бұрын басталған. Таңға дейін туғандарымызға алаңдап, бізде де ұйқы жоқ. Күнде өртте жүреді. Дұрыс техника жұмылдырса ауыздықтауға болатын еді ғой» деп жазды Аянқызы.

Керім Аянқызының жазуынша, ауыл тұрғындары бірнеше күннен бері өртпен өз күштерімен күресіп жатыр. Оның айтуынша, тілсіз жаудан бірнеше отбасы қыстағына және қысқа дайындаған шөбінен айырылған.

Төтенше жағдайлар қызметі Жаңатоған ауылы маңындағы табиғи өрт әлі де сөндіріліп жатқанын хабарлады. Ведомство мәліметінше, құрғақ шөп пен өсімдік жамылғысы өртенген. Өртті сөндіруге қатты жел мен таулы жер бедері кедергі келтіріп отыр.

«08:00-дегі жағдай бойынша өрт аумағына аэровизуалды барлау жүргізілді. Жаңа ашық жану ошақтары анықталған жоқ. Елді мекендерге қауіп жоқ. Өртті оқшаулау және сөндіру жұмыстары жалғасып жатыр, жағдай тұрақты бақылауда», – деп хабарлады ТЖД.

Оқи отырыңыз:

• Бақытжан Базарбек Жамбыл облысында адам қағып кетті ме? Полиция не дейді?
• Қостанай облысында әкесі мен қызы Тобыл өзеніне батып қаза тапты