Шымкент сыра зауытының бұрынғы иесі Тоқтар Төлешовтің үйі аукционға шығарылды

Шымкентте бұрынғы сыра зауытының иесі Тоқтар Төлешовке қатысы бар үй 240,2 млн теңге бастапқы бағамен аукционға қойылды. Сауда 2026 жылғы 27 тамызға белгіленген, деп хабарлайды Orda.kz.       

E-qazyna сауда алаңындағы лот мәліметіне сәйкес, нысан Шымкенттің Әл-Фараби ауданындағы Желтоқсан көшесінде орналасқан. Лот құрамына жалпы ауданы 314,5 шаршы метр болатын бірнеше құрылыс нысаны және көлемі 0,0644 гектар жер учаскесі кіреді.

Негізгі екі қабатты үйдің аумағы 191,8 шаршы метр. Сонымен қатар 73,6 шаршы метрлік тағы бір тұрғын үй нысаны, 35 шаршы метрлік жапсаржай, 34,6 шаршы метрлік жертөле және 14,1 шаршы метрлік сарай бар.

Аукционға қатысу үшін белгіленген кепілдік жарна – 12 млн теңге. Сауда төмендету тәсілімен өтетіндіктен, нысанның бағасы ең төменгі 40 млн теңгеге дейін түсуі мүмкін.

«S&T Капитал» компаниясының 2026 жылғы 12 маусымдағы бағалау есебінде бұл жылжымайтын мүліктің құны 80,1 млн теңге деп көрсетілген.

Ал аукциондағы бастапқы баға 240,2 млн теңге болып белгіленген. Яғни аукционның бастапқы бағасы бағалау есебіндегі құннан шамамен үш есе жоғары.

Нысанның сатушысы әрі баланс ұстаушысы ретінде «Дархан Group» компаниясы көрсетілген. Айтпақшы, 2015–2021 жылдары «Дархан Group» компаниясы Тоқтар Төлешовке тиесілі болған.

2014 жылдан бастап компания иесі ретінде Нұрғали Досанбаев көрсетілген. Ал 2021 жылдан бастап оның құрылтайшылары қатарында Қаржы министрлігінің Мемлекеттік мүлік және жекешелендіру комитеті бар.

Тоқтар Төлешов бұрын Шымкент сыра зауытының иесі болған. 2016 жылғы 30 қаңтарда ол Шымкентте жүргізілген арнайы операция барысында ұсталды. Сол жылы Мамандандырылған ауданаралық әскери сот Төлешовті мүлкін тәркілей отырып, 21 жылға бас бостандығынан айырды.

2017 жылы сот оны салық төлеуден жалтарғаны үшін де кінәлі деп танып, тағы 5 жылға бас бостандығынан айыру жазасын тағайындады. Сонымен қатар Төлешов мемлекетке 1,4 млрд теңгеден астам қаражат төлеуге тиіс болды.

Қазір Төлешовтің қорғаушылары оның ісіндегі қылмыстық құқық бұзушылықтардың саралануын қайта қарауға тырысып жатыр. 
 
 

Оқи отырыңыз:

• Maxi шай курьерлері жалақының төмендігі мен басшылық қысымы туралы мәлімдеді
• «Қазақ еліне +1 күйеу бала»: inDrive иесі Арсен Томский Камила Лұқпановаға үйленді