Жамбыл облысында 19 жастағы әйел «Барниге» бола күйеуімен жанжалдасып, кейін қайтыс болды

Жамбыл облысының Меркі ауданында 19 жастағы Өзбекстан азаматының өліміне қатысты қылмыстық іс тергеліп жатыр. Марқұмның сегіз айлық баласы қалған. Ал өлімге алып келген жанжал «Барни» бәлішін жеп қоюынан басталған, деп хабарлайды Orda.kz.

Полиция әйелдің өліміне қатысты «суицидке дейін жеткізу» бабы бойынша сотқа дейінгі тергеп-тексеру бастаған. Тергеу жалғасып жатқандықтан, ведомство істің мән-жайын әзірге жариялаған жоқ.

Әлеуметтік желіде марқұмның құрбысы Зейнеп Мусахожанованың айтуынша, Мадина бұған дейін де отбасындағы жанжалдарға шағымданып, күйеуінің күш көрсеткенін айтқан.

Қайғылы жағдайдан аз уақыт бұрын Мадина құрбысына күйеуімен жанжалдасқанын жазған. Оның айтуынша, жанжал күйеуінің балаға алып келген «Барни» бәлішін жеп қоюынан басталған екен.

«Бүгін бір «Барни» үшін қатты ұрысып қалдық. Тіпті ұрды, келіп басымнан ұрды да, мен құлап қалдым. Елестетші, бір ғана «Барни» үшін» деп жазған Мадина.

Құрбысының сөзінше, келесі күні Мадина заттарын жинап, күйеуінен кетіп, ажырасқысы келетінін айтқан. Алайда кейін оның қайтыс болғаны туралы хабар жеткен.

Жамбыл облысының полиция департаменті әйелдің өлімі бойынша суицидке дейін жеткізу фактісімен сотқа дейінгі тергеп-тексеру басталғанын растады.

«Қазіргі уақытта болған оқиғаның барлық мән-жайын анықтауға бағытталған қажетті тергеу әрекеттері жүргізіліп жатыр»,  деп хабарлады полиция.

Сонымен қатар, тергеу барысында Мадинаның күйеуінің күш қолданғаны туралы мәлімдемелер, отбасындағы жанжалдардың мән-жайы және олардың жас әйелдің өліміне ықтимал байланысы тексерілетінін айтты. Қазіргі уақытта, күйеуінің әйелге күш қолданғаны туралы мәліметтер ресми түрде расталған жоқ.

Оқи отырыңыз:

• Бақытжан Базарбек жол апатына қатысты алғаш рет пікір білдірді
• Жаңатоған ауылының тұрғындары өртпен өздері күресіп жатыр: Бір адам ауыр жараланды