«15 млн теңге бер, әйтпесе қылмыстық жауапкершілікке тартамыз»: Түркістанда жалған ҚМА қызметкерлері ұсталды

Қаржылық мониторинг агенттігінің міндетті әлеуметтік медициналық сақтандыру саласындағы қаражат жымқырудың жолын кесу бағытындағы жұмысына байланысты алаяқтық әрекеттер жиілеп кеткен. Бұл туралы Orda.kz Қаржылық мониторинг агенттігіне сілтеме жасап хабарлайды.

Міндетті медициналық сақтандыру саласындағы алаяқтықтың жаңа түрі анықталды

Алаяқтар өздерін Агенттік қызметкері ретінде таныстырып, медициналық ұйым басшыларын анықталған заңбұзушылықтар бойынша қылмыстық жауапкершілікке тартамыз деп қорқытады. Артынша жауапкершіліктен босатуға уәде беріп, сол үшін ақша талап етеді.

Осындай алаяқтық схема Түркістан облысында әшкереленді.

Екі адам өздерін Қаржылық мониторинг агенттігі қызметкері ретінде таныстырып, алдау арқылы медициналық ұйымдардың бірінің басшысынан 15 миллион теңге алуға әрекет жасаған.

Алаяқтар 5 миллион теңге алғаннан кейін, қалған 10 миллион теңгені беруді талап еткен.

8 тамызда оларды Түркістан облысы бойынша Экономикалық тергеп-тексеру департаменті қызметкерлері Агенттіктің Ішкі қауіпсіздік департаментімен бірлесіп, қылмыс үстінде ұстады.

Сот күдіктілерге қатысты қамауда ұстау түріндегі бұлтартпау шарасын санкциялады.

Қазір тергеу амалдары жалғасып жатыр.

Агенттік өкілдері жауапкершілікке тартамыз деп қорқытып, ақша талап еткен немесе жазадан құтқаруға уәде беру арқылы қаражат сұраудың кез келген түрі заңсыз әрекет болып саналатынын ескертеді.

Осындай фактілерге тап болған жағдайда Қаржылық мониторинг агенттігінің 1458 нөмірлі байланыс орталығына дереу хабарласу қажет.

Оқи отырыңыз:

• Бақытжан Базарбек Жамбыл облысында адам қағып кетті ме? Полиция не дейді?
• «Қазақ еліне +1 күйеу бала»: inDrive иесі Арсен Томский Камила Лұқпановаға үйленді