Азия чемпионаты: Еліміздің ауыратлеттері 59 медаль алып, бес әлемдік рекорд орнатты

Қазақстанның ауыр атлетикадан құрама командасы Ташкентте өткен жасөспірімдер мен жастар арасындағы Азия чемпионатында 59 медаль жеңіп алды. Отандастарымыз жарыс барысында бес әлемдік және 11 Азия рекордын жаңартты, деп хабарлайды Orda.kz Қазақстанның ауыр атлетикадан ұлттық құрамасына сілтеп.  

Бәсекелер 7–14 тамыз аралығында өтті. Қазақстан сапынан 28 ауыр атлет сынға түсті. Жарыстың жұлқа көтеру, серпе көтеру және қос сайыс қорытындысы бойынша спортшыларымыз 59 жүлдеге ие болды. Оның 19-ы алтын медаль.

Қазақстан 17 жасқа дейінгі қыздар арасында жалпы командалық есепте бірінші орын алды. Ал 20 жасқа дейінгі жасөспірімдер құрамасы да чемпионатқа қатысқан елдер арасында топ жарды.

Турнирдің басты қаһармандарының бірі Снежана Қашқарова болды. Ол 57 келіге дейінгі салмақта 17 жасқа дейінгі қыздар арасында үш алтын медаль жеңіп алды. Спортшы жұлқа көтеруде 88 келі, серпе көтеруде 112 келі көтеріп, қос сайыста 200 келі нәтиже көрсетті.

20 жасқа дейінгі жасөспірімдер арасында Қашқарова жұлқа көтеруден күміс, ал серпе көтеру мен қос сайыстан екі алтын медаль алды. Жарыс барысында ол үш әлемдік және үш Азия рекордын жаңартты. Сонымен қатар қазақстандық спортшы Азияның ауыр атлетикадағы ең үздік спортшысы деп танылды.

Тағы екі әлемдік рекордты Ксения Прозорова орнатты. Ол 17 жасқа дейінгі қыздар арасында 61 келіге дейінгі салмақта жұлқа көтеруде 94 келіні еңсеріп, алтын медаль жеңіп алды. Қос сайыстағы нәтижесі – 204 келі. Ал серпе көтеруде 110 келіні көтеріп, екінші орынға ие болды. Оның еншісінде сондай-ақ екі Азия рекорды бар.

Аянат Жұмағали 20 жасқа дейінгі жасөспірімдер арасында Азияның үш дүркін чемпионы атанды. Ол 77 келіге дейінгі салмақта жұлқа көтеру, серпе көтеру және қос сайыстың үшеуінде де алтын медаль алды.

Сондай-ақ Нұржан Жұмабай да сәтті өнер көрсетті. 17 жасқа дейінгі спортшылар арасында 95 келіге дейінгі салмақта ол екі алтын және бір күміс медаль жеңіп алып, үш Азия рекордын жаңартты.

Ақжол Құрманбек 20 жасқа дейінгі жасөспірімдер арасында екі алтын және бір күміс медаль иеленіп, екі Азия рекордын орнатты.

Ал Бейбарыс Ерсейіт 17 жасқа дейінгі жасөспірімдер арасында екі алтын және бір күміс медаль жеңіп алып, Азия рекордын жаңартты.

Чемпионатта Қазақстан қоржынына Асанхан Төрехан, Әлихан Әскербай, София Шешукова, Берікбол Нұрсыйла, Маргарита Ермакова, Кира Данилова, Ерасыл Сәулебеков, Нұрасыл Арапбай, Ерсұлтан Тұрсынбеков, Рамазан Омар, Жанасыл Арапбай және Айғаным Жанболат та жүлде салды.

Осылайша, Қазақстан құрамасы Ташкенттегі Азия чемпионатын 59 медальмен, оның ішінде 19 алтынмен аяқтады. Отандастарымыз жарыс барысында бес әлемдік және 11 Азия рекордын жаңартып, құрлықтағы жас ауыр атлеттердің арасындағы өздерінің мықты мектебін тағы бір мәрте дәлелдеді.

Оқи отырыңыз:

• Қазақстандағы алғашқы крематорийге 100 күн: Қанша адам жүгінді?
• «15 млн теңге бер, әйтпесе қылмыстық жауапкершілікке тартамыз»: Түркістанда жалған ҚМА қызметкерлері ұсталды