«Бір күнде 14 айыппұл»: Алматы облысында жүргізушілер жол камераларына шағымданды

Алматы облысында жүргізушілер жол камераларының жұмысына шағымданып жатыр. Бұл мәселе туралы Алматы тұрғыны Ришат Асқарбекұлы айтты. Оның сөзінше, мұндай жағдайға Алматы – Тараз тасжолымен тұрақты қатынайтын жүргізушілердің арасында да тап болғандар бар, деп хабарлайды Orda.kz.

Асқарбекұлының өзі соңғы бір аптада төрт айыппұл алған. Алғашқыларын 50 пайыздық жеңілдікті жіберіп алмау үшін төлеген. Алайда кейін қаулылардағы бірқатар сәйкессіздікке назар аударған.

«Тасжолда жылдамдық шектеуі 70 және 110 шқ/сағат. 97 шқ/сағат қайдан шықты? Құқық бұзушылық таңғы сағат сегізде тіркелген, бірақ фотода күн қараңғы сияқты. Бір аптада жалпы 50 мың теңгеге жуық төрт айыппұл келді. Бірақ мен тасжолда ойына келгенін істеп, қатты жылдамдықпен жүретіндердің қатарынан емеспін», деді ол. 

Алматы облысының полиция департаменті жүргізушілердің шағымдары бойынша қазір тексеру жүргізіліп жатқанын хабарлады. Полиция сондай-ақ жол қозғалысы ережелері бұзылуын камералар қызметкерлердің қатысуынсыз автоматты түрде тіркейтінін еске салды.

ІІМ тасжолдардағы қате айыппұлдарға түсініктеме берді

ІІМ 13-14 тамызда Бас прокуратураның «ЕРАП» жүйесіндегі техникалық ақауға байланысты тасжолдарда жылдамдыққа қатысты кейбір айыппұлдардың қате қалыптастырылғанын мәлімдеді.

Ақау салдарынан орташа жылдамдықты асыру фактілері бір сәттік жылдамдықты асыру ретінде рәсімделген. Қате шығарылған нұсқамалар автоматты түрде жойылады, жүргізушілерге полицияға жүгінудің қажеті жоқ.

Ал айыппұлды қателесіп төлеп қойған азаматтарға қаражатты қайтару мәселесі қазір пысықталып жатыр.

«Жағдай бақылауда», – деді ІІМ Әкімшілік полиция комитетінің төрағасы Мұрат Қабденов.

Оқи отырыңыз: 

• 16 жастағы қыз қаза тапты: Алматы облысында бір топ жасөспірім жол апатына түсті
• «Бұл арандату емес»: Бақытжан Базарбектің туыстары жол апаты туралы пікір білдірді