Енді дәрігерлердің қателігі үшін науқасқа ақы төленеді

Дәрігерлердің қателігі үшін науқасқа ақы төленетін болды, деп хабарлайды Orda.kz.

Медицина қызметкерлерінің кәсіптік жауапкершілігін сақтандыру туралы заң күшіне енді.

Медициналық ұйымдар және жеке медициналық практикамен айналысатын жеке тұлғалар медицина қызметкерлерінің кәсіптік жауапкершілігін сақтандыру шартын жасасуға міндетті. Сақтандыру шарты Medpul.kz электрондық ақпараттық жүйе арқылы жүзеге асады.

Сақтандыру төлемдері дәрігерлердің байқаусызда жасаған кәсіби қателіктерінен зардап шеккен пациентке төленетін болады. Өмірі мен денсаулығына зиян келтіру фактісін растау және сақтандыру төлемін алу үшін пациентке немесе оның жақын туыстарына денсаулық сақтау мекемесіне жүгіну қажет.

Медициналық қызмет кезінде пациенттің өмірі мен денсаулығына зиян келтіру фактісінің болу-болмауы туралы шешімді тәуелсіз сараптама комиссиясы қабылдайды.