«Әділет» партиясы сайлауалды бағдарламасы мен кандидаттар тізімін бекітті

Ұйымдастырушылық мәселелер қаралғаннан кейін «Әділет» партиясының кезектен тыс III съезінде делегаттар сайлауалды бағдарламаның негізгі басымдықтарын талқылап, Қазақстан Республикасы Құрылтайы депутаттығына ұсынылатын кандидаттардың партиялық тізімін бекітті, деп хабарлайды Orda.kz.       

Күн тәртібіндегі басты мәселе – мазмұны жаңартылған сайлауалды бағдарламаны қабылдау болды. Құжат сегіз негізгі бағыттан тұрады. Әр бағытты партияның Саяси кеңес мүшелері таныстырды.

Бағдат Мусин цифрлық мемлекет құру бастамаларын ұсынса, Замира Кузиева өңірлік даму мәселелеріне тоқталды. Ренат Бектұров әділетті экономиканы қалыптастыру жолдарын таныстырды. Динара Зәкиева әлеуметтік саясатқа қатысты ұсыныстарын ортаға салды. Лаура Қарабасова адами капиталды дамытуға назар аударды. Қарлығаш Жаманқұлова мәдениет саласына қатысты бастамаларды жеткізді, ал Ирина Тен экология бағытындағы ұсыныстарын ұсынды.

Талқылауды қорытындылаған партия төрағасы Айбек Дәдебай бұл бағдарламаның кең ауқымды сараптамалық және қоғамдық жұмыстың нәтижесі екенін атап өтті.

«Бүгін бекітілген құжат кабинетте жазылған жоқ. Оның негізіне президент Қасым-Жомарт Тоқаевтың стратегиялық бастамалары, әлеуметтік зерттеулер қорытындылары, партия өткізген талқылаулар, сондай-ақ азаматтар мен сарапшылардың ұсыныстары алынды», – деді ол. 

Айбек Дәдебайдың айтуынша, бағдарлама тек негізгі бағыттарды айқындап қана қоймай, қоғамдағы өзекті мәселелерді шешудің нақты жолдарын да ұсынады.

«Бағдарламаның басты ерекшелігі – оның азаматтардың мүддесіне негізделуінде. Әр бөлімнің өзегінде нақты адам, оның өмірі, қажеттілігі мен үміті жатыр», – деді партия төрағасы. 

Сөз соңында ол бағдарламаның бекітілуімен партия сайлау науқанының келесі кезеңіне өтетінін айтты. Ендігі басымдық – өңірлерде халықпен жұмыс жүргізу және бағдарламаны кеңінен түсіндіру.

«Жаңа Конституция елге жаңа мүмкіндік ашты. Енді сол мүмкіндіктерді тиімді пайдалану маңызды. Елдің болашағын адамдар айқындайды. Бүгін біз осы жауапкершілікті мойнына алуға дайын кандидаттар тобын бекіттік. Бұл – уәде берумен шектелмейтін, болашақты бірге құруға дайын команда», – деп түйіндеді Айбек Дәдебай. 

Съезде сондай-ақ Құрылтай депутаттығына кандидаттардың партиялық тізімі бекітілді. Делегаттар ұсынылған үміткерлерге қолдау білдіріп, олардың алдағы реформаларды жүзеге асыруда маңызды рөл атқаратынына сенім білдірді.

«Әділет» партиясы 186 кандидаттан тұратын ең ауқымды тізімді ұсынды. Оның құрамына ғылым, білім, бизнес, өнеркәсіп, цифрлық сала, мәдениет, спорт және азаматтық қоғам өкілдері енді.

Күн тәртібіндегі барлық мәселелер қаралғаннан кейін съезд делегаттары тиісті қаулы қабылдап, барлық шешімдерді бекітті.

Оқи отырыңыз:

• Астанада «Әділет» партиясының құрылтай съезі өтті
• Қазақстанда «Әділет» партиясы ресми тіркелді
• Amanat өкілдері Adilet-ке қосылатынын ресми жариялады