Қостанайда пойыз вагонына шыққан жасөспірім тоққа түсіп, ауыр күйік алды

Қостанайда пойыз вагонының үстіне шығып суретке түспек болған жасөспірім тоққа түсіп, денесінің 60 пайызын күйік шалды. Оқиғадан кейін оның қамқоршысы әкімшілік жауапкершілікке тартылды, деп хабарлайды Orda.kz.

Қостанай облысының мамандандырылған ауданаралық кәмелетке толмағандар істері жөніндегі сотының мәліметінше, оқиға 2026 жылғы 25 маусымда Қостанай станциясының Оңтүстік теміржол паркінде болған.

Жасөспірім суретке түсу үшін байланыс сымдарының астында тұрған пойыз вагонының төбесіне шыққан. Салдарынан оны электр тогы соғып, денесінің 60 пайызын III дәрежелі күйік шалған, сондай-ақ мұрны мен тілі жарақаттанған. 

Сот мәліметінше, кәмелетке толмаған баланың қауіпсіздігін қамтамасыз етпегені үшін оның қамқоршысы жауапқа тартылған.

Сот отырысында ер адам кінәсін толық мойындап, баланың анасы қайтыс болғаннан кейін жиеніне қамқоршы болғанын айтқан. Сот қаулысымен ол Әкімшілік құқық бұзушылық туралы кодекстің 127-бабының 1-бөлігі бойынша кінәлі деп танылып, 43 250 теңге көлемінде айыппұл салынды.

Қаулы әзірге заңды күшіне енген жоқ.

Оқи отырыңыз:

Төрт күдікті ұсталды: Ақтау маңындағы Ақшұқыр ауылында көлік жуатын орында атыс болды

Астанада мешітте намаз оқып жатқан ер адамның телефонын ұрлап кеткен