Екібастұз ЖЭО басшысының өліміне қатысты тың ақпарат пайда болды

Екібастұз ЖЭО учаскесінің басшысы Сергей Видлог жұбайымен жанжалдасып қайтыс болды, деп хабарлады қалалық полиция департаменті.

 «Тергеу жүріп жатыр.  Алдын ала болжам бойынша, мән-жай марқұмның гаражында әйелімен жанжалдасып болған соң болған.  Бірқатар сараптамалар тағайындалды, оның қорытындысы бойынша шешім қабылданады.  Полиция қызметкерлерінің ішкі құжатын тарату фактісі бойынша Павлодар облысының полиция департаменті қызметтік тексеру жүргізіп жатыр» деп түсіндірді Екібастұз полицейлері.

Еске салсақ, 27 қарашаға қараған түні Павлодар облысындағы Екібастұз қаласы 30 градустық аязда жылу электр орталығындағы қазандықтардың тоқтап қалуына байланысты жылусыз қалған болатын.  Нысан олигарх Александр Клебановтың бақылауында – жыл басынан бері бұл оның қарамағындағы ЖЭО-да орын алған екінші ірі апат.  28 қарашада Екібастұзда төтенше жағдай режимі енгізілді.