Бекіре-2026: Жайық–Каспий аумағынан 7 тоннадан астам балық заңсыз ауланған

15 мамыр 2026 16:58 Ләззат Сұңқар

Фото: Жайық Пресс

«Бекіре-2026» акциясы басталғалы Жайық–Каспий бассейнінде 912 заңбұзушылық анықталып, 26 қылмыстық іс қозғалды, деп хабарлайды Orda.kz.

Науқанның мақсаты — бекіре тұқымдас және өзге де балық түрлерін сақтау, олардың уылдырық шашу кезеңін қорғау.

Заңсыз айналымнан 7,2 тоннадан астам балық тәркіленді (оның ішінде 444 келі бекіре тұқымдас балық және 3,2 келі уылдырық), сондай-ақ 102 ау мен 73 жүзу және көлік құралдары алынды.

677 адам әкімшілік жауапкершілікке тартылып, салынған айыппұлдар жалпы 18,4 млн теңге болды. Бұдан бөлек, күнделікті тексеру барысында су айдындарынан 835 заңсыз ау құралы шығарылды.

Еске салсақ, жақында ғана осы «Бекіре-2026» акциясы барысында Атырау облысында 378 заңбұзушылық анықталып, 13 қылмыстық іс қозғалған болатын.

Биылғы жылдың 1 сәуірінен 31 мамырына дейін Атырау, Маңғыстау және Батыс Қазақстан облыстарында жыл сайынғы «Бекіре» кең ауқымды балық қорғау акциясы өтіп жатыр.

Айтпақшы, Қазақстанда заңсыз ауланған бекіре балығы мен уылдырықты сатып алғаны үшін қылмыстық жауапкершілік қарастырылған.

Атырау облысының прокуратурасы жеке тұлғалардан шығу тегі күмәнді, тиісті рұқсат құжаттары жоқ балық пен уылдырықты сатып алу қылмыстық құқық бұзушылыққа қатысушы болуға әкелуі мүмкін екенін ескертті. Тек өткен жылдың өзінде айыптау актісімен сотқа 11 қылмыстық іс жолданып, олардың нәтижесінде 10 адам сотталған.

Прокуратура Қылмыстық кодекстің 339 және 339-1 баптары тек браконьерлерге ғана емес, сондай-ақ сатып алушылар мен қайта сатушыларға да қылмыстық жауапкершілік қарастырылғанын ерекше атап өтті.

Оқи отырыңыз:

Жаңалықтар

барлық жаңалықтар