Бекіре балығы мен уылдырығын сатып алғандар да жазаланады

Қазақстанда заңсыз ауланған бекіре балығы мен уылдырықты сатып алғаны үшін қылмыстық жауапкершілік қарастырылған, деп хабарлайды Orda.kz.      

Атырау облысының прокуратурасы жеке тұлғалардан шығу тегі күмәнді, тиісті рұқсат құжаттары жоқ балық пен уылдырықты сатып алу қылмыстық құқық бұзушылыққа қатысушы болуға әкелуі мүмкін екенін ескертті.

Тек өткен жылдың өзінде айыптау актісімен сотқа 11 қылмыстық іс жолданып, олардың нәтижесінде 10 адам сотталған.

Прокуратура Қылмыстық кодекстің 339 және 339-1 баптары тек браконьерлерге ғана емес, сондай-ақ сатып алушылар мен қайта сатушыларға да қылмыстық жауапкершілік қарастырылғанын ерекше атап өтті.

Соңғы жағдайлардың бірінде Атырау тұрғынының автокөлігінің жүксалғышынан 502 келі бекіре тұқымдас балық табылған.

Сот оны кінәлі деп танып, 7 жылға бас бостандығынан айыру жазасын тағайындады. Сонымен қатар сот оны 304 миллион теңгеден астам материалдық шығын мен мемлекеттік бажды өтеуге міндеттеді.

Бірнеше күн бұрын «Бекіре-2026» акциясы: Атырау облысында 378 заңбұзушылық анықталып,13 қылмыстық іс қозғалған болатын. 

Биылғы жылдың 1 сәуірінен 31 мамырына дейін Атырау, Маңғыстау және Батыс Қазақстан облыстарында жыл сайынғы «Бекіре» кең ауқымды балық қорғау акциясы өтетінін бұған дейін ауыл шаруашылығы министрлігі хабарлаған болатын.

Оқи отырыңыз: 

• «Бекіре-2026» акциясы: Атырау облысында 378 заңбұзушылық анықталып,13 қылмыстық іс қозғалды
• Маңғыстау тұрғынынан 110 келі бекіре балығы тәркіленді
• Тоннадан астам уылдырықты Ресейден заңсыз әкелмек болған