Forbes жариялаған Қазақстандағы 44 жасқа дейінгі ең бай сегіз бизнесмен кім?

15 мамыр 2026 12:36 Ләззат Сұңқар

Сурет ЖИ көмегімен жасалды

Forbes Kazakhstan елдегі ең жас әрі дәулетті кәсіпкерлер тізімін жариялады. Рейтингке 44 жасқа дейінгі сегіз бизнесмен енген. Олардың қатарында тұңғыш президенттің немересі Нұрәлі Әлиев, Freedom Holding басшысы Тимур Турлов және «Ордабасы» футбол клубының болашақ иесі Шахмұрат Мүтәліп бар, деп хабарлайды Orda.kz.

Тізімдегі ең бай жас кәсіпкер – 38 жастағы Тимур Турлов. Ол жалпы рейтингте алтыншы орынды иеленді. Бір жыл ішінде 600 млн доллар жоғалтқанына қарамастан, Freedom Holding Corp. негізін қалаушының байлығын Forbes 5,2 млрд доллар деп бағалаған. Оның бизнес құрылымына банк, сақтандыру және инвестициялық компаниялар, сондай-ақ түрлі онлайн сервистер кіреді.

Рейтингке сондай-ақ 41 жастағы Нұрәлі Әлиев те енді. Ол 41-орынға жайғасты. Журнал оның дәулетін 280 млн доллар деп бағалаған. Әлиев Capital Holding пен Darmen Holding компанияларында үлеске ие, сондай-ақ Donatello қонақүй жобалары мен мейрамхана бизнесін басқарады. 2025 жылы ол «Транстелеком» компаниясынан шыққан.

Тізімдегі ең жас қатысушы – 35 жастағы Шахмұрат Мүтәліп. Ол Integra Construction KZ компаниясының бенефициары және 22-орынды иеленген. Forbes оның байлығын 482 млн доллар деп бағалады. Оның компаниясы Құрық портында нысандар, тұрғын үй кешендері, жолдар және әуежай инфрақұрылымын салумен айналысқан. Сонымен қатар сәуір айында Муталиптің құрылымы Көкшетауда стадион салатыны, ал кәсіпкердің өзі «Ордабасы» футбол клубын басқаруға алатыны белгілі болды.

Рейтингке 44 жастағы Ғалымжан Есенов те кірді. Ол 564 млн доллар байлығымен 19-орынға жайғасты. Бұрын Alatau City Bank-тің иесі болған ол қазір аграрлық бизнесті дамытып, «Транстелекомдағы» үлесті Тимур Турловқа сату мәмілесіне қатысып жатыр. Оның жұбайы Айжан Есім де тізімге енді – оның дәулеті 207 млн доллар деп бағаланған.

Сондай-ақ рейтингте 44 жастағы агробизнес өкілі Алмаз Әлсенов бар. Ол 204 млн доллармен 48-орынды иеленді. Оның негізгі активі – ауыл шаруашылығы өнімдерінің халықаралық саудасы мен логистикасымен айналысатын швейцариялық Harvest Group компаниясы. Сонымен бірге кәсіпкер Қазақстанда аграрлық жобаларды жүзеге асырып келеді.

42 жастағы Айғазы Құсайынов 132 млн доллар байлығымен 64-орынға жайғасты. Ол құрамына ҚазБСҚА, ҚАУ, колледждер мен жекеменшік мектептер кіретін Халықаралық білім беру корпорациясына иелік етеді. Бұдан бөлек, Verum Group арқылы мыс өндіру, құрылыс және агробизнес салаларында да жұмыс істейді.

Рейтингке 41 жастағы ресторатор Асқар Байтасов та енді. Ол 68-орынды иеленген. Forbes оның дәулетін 112 млн доллар деп бағалады. Ол 50-ден астам мейрамхананы біріктіретін ABR компаниялар тобын құрған және ABR Tech арқылы IT бағытын дамытып келеді.

Оқи отырыңыз:

Жаңалықтар

барлық жаңалықтар