Атырауда бір отбасын қырып тастаған қанды қылмыс бойынша тергеу аяқталды

Атырау облысының Жангелдин ауылындағы бір отбасы мүшелерін бірінен соң бірін қатыгездікпен өлтіріп тынған күйеу балаға қатысты резонансты іс бойынша басты күдікті Сұлтан Сәрсемалиев тергеу абақтысында сот шешімін күтіп отыр, деп хабарлайды Orda.kz.

Іс екі және одан да көп адамды өлтіру бабы бойынша тергелді. Сонымен қатар тергеу аясында Қылмыстық кодекстің 188 және 190-баптары — ұрлық және алаяқтық бойынша қосымша қылмыстық істер тіркелген. Әңгіме қаза тапқан отбасының малын сату мен олардың банк карталарындағы ақшаны жымқыру туралы болып отыр.

«Ақ Жайық» басылымының мәліметінше, айыпталушы қылмыстық іс материалдарымен танысып, төрт адамды өлтіру фактісі бойынша кінәсін мойындаған.

Алдын ала деректерге сәйкес, қылмыстық іс мамыр айында сотқа жолданды. Енді сот процесі басталады.

Бұған дейін Атырау облысының прокуратурасы психологиялық-психиатриялық сараптама қорытындысы бойынша Сұлтан Сәрсемалиевтің есі дұрыс деп танылғанын хабарлаған. Күдіктінің жұбайы Ақбаян Мұқанғалиева сот санкциясымен стационарлық сот-психологиялық-психиатриялық сараптамадан өту үшін мамандандырылған медициналық мекемеге орналастырылған.

Жангелдин ауылында бір отбасының  төрт адамы бірдей ұшты-күйлі жоғалып кеткені туралы өткен жылдың желтоқсанында белгілі болған еді.

2026 жылдың қаңтарында Атырау облысының Жангелдин ауылында жоғалған ерлі-зайыптының мәйіттері Қызылқоға ауданындағы өз үйлерінің қорасынан табылды.

Күдіктінің өзі және оның азаматтық жұбайы 24 ақпанда Индонезияның Ломбок аралында ұсталып, кейін Атырауға жеткізілген.

Қаза тапқан ерлі-зайыптының балалары — Наурыз Мұқанғалиев пен Мейрамгүл Қарабалинаның мәйіттері наурыз айында Атырау қаласының шетінен табылды. Сәрсемалиев оларды Геолог ықшамауданындағы жалға алынған үйдің ауласына көміп тастағанын мойындаған.

Бұған дейін біз Наурыз бен Мейрамгүлдің қалай жоғалып кеткені туралы оқиғалар тізбегін жариялаған болатынбыз.
 
 Оқи отырыңыз:

• Атыраудағы қайын жұртын қырып тастаған күдіктіге ұрлық пен алаяқтық айыптары қосылды
• «Бекіре-2026» акциясы: Атырау облысында 378 заңбұзушылық анықталып,13 қылмыстық іс қозғалды
• ҚТЖ-ның Атырау филиалы басшысы құпия есік арқылы жоқ болып кеткен
• Атырау облысындағы жұмбақ өлім: Бүтін бір отбасын жайратып салған күдікті «Самурай» кім?